Польшча гатовая адкрыць пункты пропуску на мяжы з Беларуссю. Але ёсць умовы

Польшча гатовая адкрыць пункты пропуску на мяжы з Беларуссю, калі Аляксандр Лукашэнка пойдзе на саступкі. Пра гэта заявіў намеснік міністра ўнутраных спраў Польшчы Мацей Вонсік, піша Reform.by. Пытанне ўзнікла ў сувязі з кансультацыямі кіраўнікоў МУС Польшчы і краін Балтыі, якія прайшлі ў панядзелак. На сустрэчы, нагадаем, абмяркоўвалася пытанне аб поўным закрыцці межаў з Беларуссю. Журналісты спыталі Вонсіка пра магчымую рэакцыю Мінска на гэтую сустрэчу, ці ёсць шанец, што пазіцыя Лукашэнкі змякчыцца.

"Я спадзяюся, што памякчэе ў многіх вымярэннях, не толькі ў міграцыйнай палітыцы, але і ў гульні мускуламі", — заявіў намеснік кіраўніка польскага МУС. Паводле яго слоў, у Варшаве чакаюць, што Лукашэнка даможацца вываду групы "Вагнер" з Беларусі. "Гэта пэўная праблема ў перспектыве для Лукашэнкі, таму што калі ім нешта не спадабаецца ў Беларусі (беларускае войска слабае), могуць проста паехаць на Мінск, як ехалі на Маскву. Гэта будзе ім нашмат прасцей", – растлумачыў сваю пазіцыю Вонсік. Ён таксама заявіў, што павінна вырашыцца і міграцыйнае пытанне, трэба зніжаць і ціск на мяжу.

"Калі Беларусь не хоча быць ізаляванай, то павінна пачаць супрацоўнічаць. Гэта, відавочна, павінна быць аплачана Беларусі. Можа быць, адкрыем частку памежных пераходаў, закрытых цяпер", – сказаў ён. Але калі супрацоўніцтва і рэакцыі з беларускага боку не будзе, то ў пэўны момант усе тры краіны, Польшча, Літва і Латвія, гатовыя закрыць усе памежныя пераходы, у тым ліку і чыгуначныя, папярэдзіў польскі чыноўнік. У гэтым выпадку Беларусь фактычна будзе адрэзаная ад Еўропы.