Першы намеснік кіраўніка МУС: пры неабходнасці будзем ужываць баявую зброю

Пры неабходнасці міліцыянты і вайскоўцы ўнутраных войскай будуць ужываць супраць пратэстоўцаў баявую зброю. Пра гэта заявіў першы намеснік міністра ўнутраных спраў Генадзь Казакевіч у сваім відэазвароце.

Ён паведаміў, што пратэсты змяншаюцца і канцэнтруюцца пераважна ў Мінску. Пры гэтым, кажа Казакевіч, акцыі пратэсту сталі "арганізаванымі і вельмі радыкальнымі".

"У сувязі з гэтым супрацоўнікі органаў унутраных спраў і вайскоўцы ўнутраных войскаў не сыдуць з вуліц і ў выпадку неабходнасці будуць ужываць спецсродкі і баявую зброю", — прыстрашыў першы намеснік міністра.

Дагэтуль пры разгоне акцыяў сілавікі ўжывалі святлошумавыя гранаты, пярцовы газ, выбух-пакеты, гумовыя кулі. 

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.