Павышэнне ўзроўню радыяцыі каля ЧАЭС магло адбыцца праз падняты пыл
Чарнобыльская АЭС / Еўрарадыё
Павышэнне гама-выпраменьвання ў зоне адчужэння каля Чарнобыльскай АЭС магло адбыцца праз падняты пыл. Так пракаментавалі сітуацыю ў Дзяржаўнай інспекцыі ядзернага рэгулявання Украіны.
Раніцай у пятніцу з'явілася інфармацыя аб перавышэнні кантрольных узроўняў дозы гама-выпраменьвання ў зоне адчужэння. Напярэдадні на тэрыторыю ЧАЭС заехала расійская вайсковая тэхніка.
"Спецыялісты Экацэнтра звязваюць гэта (перавышэнне ўзроўняў выпраменьвання) з парушэннем верхняга пласта глебы ад руху вялікай колькасці цяжкай вайсковай тэхнікі праз зону адчужэння і павелічэннем забруджвання паветра", — гаворыцца ў заяве ўстановы.
Там таксама падкрэслілі, што стан чарнобыльскіх атамных аб'ектаў нязменны.
Фізік Андрэй Ажароўскі раней меркаваў, што павышэнне гама-выпраменьвання можа быць звязанае з пашкоджаннем якой-небудзь сістэмы бяспекі альбо з тым, што персанал ЧАЭС пасля прыходу вайскоўцаў пакінуў працоўныя месцы, і якая-небудзь сістэма бяспекі перастала працаваць.
