Паветраныя трывогі ў Кіеве і абстрэл Ізюма — як прайшла чарговая ноч ва Украіне
Разбурэння ў Жытоміры / @dsns_telegram
Авіяналёт перажыў мінулай ноччу горад Ізюм Харкаўскай вобласці.
"Атака пачалася прыкладна а 23: 59, удар прыйшоўся на шматпавярховік і прыватны дом", — паведамляе ўкраінскі тэлеканал "Суспільне" са спасылкай на мэра горада Уладзіміра Мацокіна.
Пазней мэр горада ўдакладніў страты: 8 загінулых, двое з іх — дзеці. Яны былі ў тым у прыватным доме, які падвергнуўся абстрэлу.
Гэты ж рэсурс паведамляе аб 4 выбухах у Кіеве гэтай ноччу. Адзін з іх прагрымеў падчас працы ў эфіры журналістаў амерыканскага тэлеканала CBS.
CBS News producer @redmanjustine captured the "biggest blasts we've ever seen" in the sky over #Kyiv, just as @charliecbs was coming off the air tonight in Ukraine pic.twitter.com/KgrseZb6gX
— CBS Evening News (@CBSEveningNews) March 3, 2022
Паветраныя трывогі гэтай ноччу гучалі не толькі ў Кіеве, але і ў Мікалаеве, Жытоміры і Хмяльніцкім, перадае іншы ўкраінскі тэлеканал "Громадске".
Стала вядома, што падчас абстрэлаў Харкава загінула супрацоўніца Спецыяльнай маніторынгавай місіі АБСЕ ва Украіне Марына Феніна, а таксама пацярпеў Успенскі сабор.
Прэзідэнт Украіна Уладзімір Зяленскі мінулай ноччу выступіў з новым зваротам да грамадзян. Сказаў, што захапляецца украінцамі, што маральны стан праціўніка пагаршаецца.
"Для нас, украінцаў, гэта Айчынная вайна. Мы памятаем, як такія войны пачынаюцца. І ведаем, чым яны заканчваюцца для захопнікаў!" — сказаў Зяленскі.
У штаб-кватэры ААН, тым часам, паведамляюць, што за тыдзень Украіну пакінулі каля мільёна бежанцаў.
Але частка людзей застаецца. УНІАН распавядае гісторыю пары з Кіева, якая вырашылf ў гэтыя дні ажаніцца. Факт заключэння шлюбу 2 сакавіка засведчыў начальнік Дэпартамента патрульнай паліцыі палкоўнік Яўген Жукаў.
"Паводле законаў ваеннага становішча, я як камандзір падраздзялення засведчыў шлюб майго падначаленага і субрата Юрыя Зазулі і яго нявесты Каракінай Ангеліны Аляксандраўны!" — прыводзіць словы палкоўніка агенцтва.
У якасці букета ў нявесты былі абрэзаныя хатнія архідэі, а заручальныy пярсцёнці маладым дасталіся цудам і амаль бясплатна.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.