Паўночная Карэя ўпершыню паказала завод па ўзбагачэнні ўрану
Кім Чэн Ын на прадпрыемстве па ўзбагачэнні ўрану / KCNA via REUTERS
Дзяржаўная прэса Паўночнай Карэі ўпершыню апублікавала фота з завода, дзе вырабляюць паліва для ядзерных бомбаў. Прадпрыемства наведаў лідар КНДР Кім Чэн Ын. На фота бачныя цэнтрыфугі — машыны, якія ўзбагачаюць уран. І гэта дае "рэдкую магчымасць зазірнуць унутр ядзернай праграмы Паўночнай Карэі, якая забароненая шматлікімі рэзалюцыямі Рады бяспекі ААН", адзначае агенцтва Reuters. У паведамленні СМІ КНДР не ўдакладняецца, калі адбыўся візіт Кім Чэн Ына на прадпрыемства і дзе знаходзіцца гэты завод.
Вядома, што лідар КНДР заклікаў рабочых вырабляць больш матэрыялаў для тактычнай ядзернай зброі. Ён заявіў, што ядзерны арсенал краіны мае жыццёва важнае значэнне для супрацьстаяння пагрозам з боку Злучаных Штатаў і іх саюзнікаў. З ягоных слоў, гэтая зброя неабходная для "самаабароны і магчымасці папераджальнага нападу". На Захадзе лічаць, што ў Паўночнай Карэі ёсць некалькі аб'ектаў для ўзбагачэння ўрану.
