Патоп у Брэсце: чыноўнікі вінавацяць апалае лісце
Патоп у Брэсце / brestcity.com
У суботу ў Брэсце прайшла моцная залева, пасля якой горад, як кажуць мясцовыя жыхары ў сацсетках, ператварыўся ў Венецыю. Найбольш дасталася вуліцы Янкі Купалы і цэнтру ў раёне Гогаля, Савецкай, Пушкінскай.
Але мясцовыя чыноўнікі знайшлі апраўданне патопу. Яны заявілі, што віной усяму — апалае лісце і галінкі дрэў.
"Ліўнёўка працуе ў штатным рэжыме, але часам стыхія прыносіць сюрпрызы. Падчас моцнага дажджу і ветру на дарогу падаюць лісце і галінкі, якія забіваюць рашоткі ліўневай каналізацыі, зніжаючы яе прапускную здольнасць. Гэта таксама робіць свой унёсак у падтапленні", — піша гарвыканкам.
Паведамляецца, што працы па змаганні з наступствамі стыхіі ідуць ва ўзмоцненым рэжыме. А пакуль чыноўнікі раяць аўтамабілістам і пешаходам абыходзіць і аб'язджаць затопленыя месцы.
