Пасля скаргаў "інфаказачкі" Бондаравай Мінадукацыі мяняе школьныя дзённікі
У школе / minsknews.by
З новага навучальнага года зменіцца афармленне беларускіх дзённікаў. Гэта прадугледжана пастановай Міністэрства адукацыі, якая апублікаваная на Нацыянальным прававым партале.
Замест "подпіс законных прадстаўнікоў" будзе выкарыстоўвацца словазлучэнне "подпіс бацькоў". Раней з нагоды "законных прадстаўнікоў" у школьных дзённіках абуралася "інфаказачка" Вольга Бондарава. Яна ўбачыла ў гэтым "прапаганду заходніх каштоўнасцяў". Варта адзначыць, што паняцце "законны прадстаўнік" з'яўляецца больш шырокім і ўключае ў сябе не толькі бацькоў, але і ўсынавіцеляў, апекуноў і папячыцеляў.
Разам з тым Мінадукацыі вырашыла выправіць памылку у назве свята "Дзень беларускага пiсьменства". Зараз яно пазначана на ўнутраным боку вокладкі ў спісе святочных дзён як "Дзень беларускай пiсьменнасцi". Але "пiсьменнасць" па-рускі гэта "образованность", а "письменность" гэта "пісьменства".
