Палітвязень Уладзімір Мацкевіч — пра пасіўны супраціў беларусаў

Уладзімір Мацкевіч падкрэслівае, што рэжым "губіць і разбурае краіну", але яго агонія "можа доўжыцца доўга, нават вельмі доўга". А разам з ёй будуць працягвацца ціск і тэрор супраць "усіх, хто праяўляе сябе па адзіночцы".

23 чэрвеня філосаф Уладзімір Мацкевіч быў асуджаны на 5 гадоў калоніі ўзмоцненага рэжыму. Яго прызналі вінаватым па трох артыкулах Крымінальнага кодэкса: у "абразе Лукашэнкі", "арганізацыі і падрыхтоўцы дзеянняў, якія груба парушаюць грамадскі парадак" і "стварэнні і кіраўніцтве экстрэмісцкім фармаваннем".

Суд быў закрыты. Мацкевіч піша, што "быў бы ў Беларусі суд, выстаўленыя абвінавачванні рассыпаліся б адразу". "Суд нада мной быў закрытым не з-за сакрэтаў і таямніцы, а ад сораму, — працягвае палітвязень. — Суддзі было вельмі сорамна, але ён ад бязволля або ад страху выканаў тое, што яму загадалі. Але ж мог бы і не рабіць гэтага. Цяпер кожны застаецца са сваім сумленнем".

Мацкевіч быў затрыманы 4 жніўня 2021-га. За кратамі ў СІЗА № 1 філосаф 13 дзён трымаў галадоўку — патрабаваў выпусціць яго пад падпіску аб нявыездзе, завяршыць расследаванне і прызначыць дату суда. У жніўні мінулага года беларускія праваабаронцы прызналі Уладзіміра Мацкевіча палітвязнем.