Па крымінальнай "справе 14 ліпеня" праходзяць чацвёра падазраваных

Падазраванымі па "справе 14 ліпеня" праходзяць чатыры мужчыны. Пра гэта Следчы камітэт паведаміў у сваім Telegram-канале. 

Па выніках падзеяў 14 ліпеня Следчы камітэт пачаў крымінальную справу — па факце арганізацыі і актыўнага ўдзелу ў групавых дзеяннях, якія груба парушаюць грамадскі парадак, спалучаных з відавочным непадпарадкаваннем законным патрабаванням супрацоўнікаў органаў унутраных спраў (артыкул 342 Крымінальнага кодэкса). Паведамлялася, што траўмы атрымалі шэсць амапаўцаў, прычым чацвёра з іх былі шпіталізаваныя. "Некаторыя з іх працягваюць знаходзіцца на лячэнні ва ўстанове аховы здароўя", — удакладняюць у Следчым камітэце.

Начальнік ГУУС Мінгарвыканкама Іван Кубракоў казаў, што пры затрыманнях увечары 14 ліпеня міліцыянтам "наносілі ўдары", а яны паводзілі сябе стрымана. Хаця на шматлікіх відэаздымках бачна, што агрэсію людзі на вуліцах выказвалі толькі пасля жорсткіх дзеянняў з боку міліцыі.  

На чатырох падазраваных пачалі таксама крымінальныя справы па арт. 363 (супраціў супрацоўніку органаў унутраных спраў) і арт. 364 (гвалт у дачыненні да супрацоўніка органаў унутраных спраў). Праваабаронцы "Вясны" высветлілі імя аднаго з іх — Антон Шумаў.

Следчыя працягваюць высвятляць, хто яшчэ мае дачыненне да падзеяў 14 ліпеня.

Усе справы аб'яднаныя ў адну вытворчасць.

На пасяджэнні Цэнтрвыбаркама 14 ліпеня не былі зарэгістраваныя кандыдатамі ў прэзідэнты Віктар Бабарыка і Валерый Цапкала, якія набралі больш за ўсё подпісаў у сваю падтрымку. Увечары ў розных гарадах адбыліся мірныя вулічныя акцыі нязгоды з такім рашэннем ЦВК. Міліцыя затрымала ад 250 да 300 чалавек, прычым найбольшую колькасць — у Мінску. Сярод затрыманых былі і паўтара дзясятка журналістаў. Часта затрыманні праходзілі жорстка, што выклікала сілавую рэакцыю мінчукоў у адказ. 

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.