Някляеў эмацыйна распавёў чаму пайшоў у палітыку (фота, аўдыё)
17 снежня ў Беларускім Доме ў Варшаве адбылася літаратурная вечарына Уладзіміра Някляева.
Паэт прэзентаваў сваю новую кнігу "Знакі прыпынку", а таксама распавёў чаму пайшоў у палітыку.
Някляеў: “Я б ніколі не пайшоў у палітыку, каб не адбывалася тое, што адбываецца. Вось зараз у Беластоку ліквідавалася аддзяленне беларускай філалогіі. Перад гэтым тое самае адбылося ў Любліне. Гэта наступствы той палітыкі, якую праводзіць сённяшні рэжым у адносінах да беларускай культуры, і найперш да беларускай мовы. Ну выйшла ў мяне гэтая кніга. І хто яе будзе чытаць? Гэтая купка беларусаў на Беласточчыне і эмігранты ў Варшаве?”.
Сярод іншых на імпрэзу завіталі вядомы перакладчык з беларускай мовы на польскую Чэслаў Сэнюх, старшыня польскага ПЭН-цэнтру, перакладчык Адам Паморскі і літаратар Валярына Кустава.
