Вы тут

Новыя тэксты The Beatles і два каты Бегемоты: толькі добрыя навіны

Лыжка мёду на Еўрарадыё 

Слон убачыў суперніка ў статуі суродзіча і напаў на яго, а добрыя людзі выратавалі медзведзяня, якое ледзь не звалілася з дрэва. У экранізацыі "Майстра і Маргарыты" будзе два каты Бегемоты, а Пол Макартні выдасць раней невядомыя песні гурта The Beatles.

Пра гэта і не толькі — у аглядзе самых добрых, смешных, а часам абсурдных навін на Еўрарадыё.

Выратаванне медзведзяняці

Карыстальнікі папулярнага інтэрнэт-форуму Reddit абмяркоўваюць ролік, відавочна зняты ў халодную пару года. На ім медзведзяня залезла на дрэва, але тонкія галіны не вытрымліваюць ягонай вагі і малое пачынае падаць. На дапамогу мядзведзіку спяшаюцца гаспадары дома, якія рассцілаюць дыван, куды прызямляецца касалапы.

Карыстальнікі параўноўваюць медзведзяня з Падынгтанам і Віні-Пухам.

Новыя тэксты The Beatles

Брытанскі музыка Пол Макартні выдасць раней невядомыя песні гурта The Beatles. Да выдання рыхтуецца кніга пад назвай The Lyrics, куды і ўвойдуць тэксты.

Кніга будзе заснаваная на размовах Макартні з паэтам Полам Малдунам і ахопіць усе этапы творчасці Макартні. Атрымаецца "аўтапартрэт у 154 песнях".

The Beatles

Два каты Бегемоты!

У чарговай экранізацыі рамана Міхаіла Булгакава "Майстар і Маргарыта" будзе два каты Бегемоты.

Здымкі фільма "Воланд" працягваюцца ў Санкт-Пецярбургу. Месяц таму стваральнікі нарэшце раскрылі галоўную інтрыгу драмы: уладара Цемры будзе граць нямецкі актор Аўгусту Дылі. Гледачам ён добра знаёмы па «Ганебныя вырадкі» Таранціна.

Але высветлілася, што ёсць яшчэ сюрпрыз — два каточкі, і абодва ў ролі ката Бегемота. Адзін будзе намаляваны з дапамогай камп'ютарнай графікі, а другі — сапраўдны, які ў закулісным жыцці адгукаецца на Кешу.

Кубачак кавы, каб схуднець

Усяго адзін ранішні кубак кавы зможа дапамагчы схуднець, спальваючы карычневы тлушч за кошт цеплавога ўздзеяння. Да такой высновы прыйшлі навукоўцы з Нотынгемскага ўніверсітэта ў Вялікабрытаніі.

Прафесар Майкл Саймандс сцвярджае, што гэта першае даследаванне, якое паказала, як кава можа ўплываць на карычневы тлушч ў людзей. Гэтае адкрыццё — прарыў у навуцы, які можа дапамагчы справіцца з крызісам атлусцення.

Кубак кавы / "Фэйсбук"

Слон убачыў суперніка ў статуі суродзіча

У Тайландзе слон пераблытаў статую суродзіча з супернікам за ўвагу самак і напаў на яе, паваліў на бок і трапіў на відэа.

Не сустрэўшы ніякага супраціву з боку каменнага брата, слон адправіўся шукаць ежу. У выніку здарэння ніхто не пацярпеў.

Каб непаразуменне не паўтарылася, статую слана перамясцілі ў іншае месца.

Бойка сланоў / Credit: ViralPress

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.