Нідэрланды запрапануюць міжнародны трыбунал за збіты пад Данецкам "Боінг"

Нідэрланды абмяркоўваюць са сваімі саюзнікамі магчымасць міжнароднага трыбунала для судовага пераследу асоб, якія падазраюцца ў крушэнні малайзійскага Boeing над Данбасам у ліпені 2014 года. Пра гэта агенцтву Reuters паведамілі крыніцы, знаёмыя з ходам абмеркавання.

Правесці такі трыбунал мяркуецца пры падтрымцы Савета бяспекі ААН. Афіцыйны Амстэрдам разглядае і іншыя варыянты, але мяркуецца, што разгляд справы ў міжнародным трыбунале, а не нацыянальным судзе, будзе найбольш паспяховым.

Расследаванне авіякатастрофы ўсё яшчэ працягваецца, адзначае РБК. Галандскія пракуроры не плануюць публікаваць абвінаваўчыя акты да таго, як Савет па бяспецы Нідэрландаў выпусціць у кастрычніку справаздачу аб расследаванні авіякатастрофы.

Нагадаем, пасажырскі самалёт Boeing 777, які ляцей з Амстэрдама ў Куала-Лумпур, быў збіты 17 ліпеня 2014 года пад Данецкам. На яго борце знаходзіліся 283 пасажыры і 15 чальцоў экіпажа, усе загінулі.

У сёлетнім сакавіку паліцыя Нідэрландаў апублікавала інфармацыю групы міжнародных следчых. Там гаворыцца, што адной з версій следства разглядае ўдар з зенітна-ракетнага комплексу "Бук" з тэрыторыі, кантраляванай баевікамі.

Фота — Reuters