Навукоўцы: Скарпіён не можа выжыць у беларускіх умовах

Скарпіён мог трапіць у баранавіцкую краму і пакусаць пакупніка толькі падчас прамых паставак бананаў у Беларусь. Выжыць ва ўмовах, калі бананы даспяваюць на складах, ён не мог. Такую думку ў размове з Еўрарадыё выказаў загадчык лабараторыі наземных беспазваночных жывёл НПЦ "НАН Беларусі па біярэсурсах" Алег Прышчэпчык.

Алег Прышчэпчык: “Прамыя пастаўкі бываюць у летні час, там могуць быць і саранча і павукі. Але ў нас не прамыя пастаўкі, а пастаўкі праз склады. А там ён не мог выжыць цягам шматлікіх месяцаў без кіслароду”.

Беларускі клімат для скарпіёнаў занадта агрэсіўны, і выжыць тут яны не могуць, дадае навукоўца. Па яго словах, у Беларусі знаходзілі нават хамелеона, але ён жыў у кагосьці дома і проста збег.

Нагадаем, 30 лістапада стала вядома, што ў баранавіцкай краме пакупніка пакусаў скарпіён. Мужчыну даставілі ў лякарню, але пасля адпусцілі. Пазней стала вядома, што вылавіць скарпіёна змагла жонка пацярпелага. Гэты выпадак Еўрарадыё пацвердзіў начальнік Баранавіцкай гарадской ветэрынарнай станцыі Сяргей Мікалаеў. Дзе цяпер знаходзіцца скарпіён, невядома.