Над мазутным заводам у Санкт-Пецярбургу збілі БПЛА, быў пажар — расійскія СМІ
Выбух трапіў на камеры, усталяваныя ў тралейбусным дэпо / @fontankaspb
Расійскія СМІ паведамляюць, што мінулай ноччу над Санкт-Пецярбургам збілі беспілотнік. "Фонтанка" піша, што БПЛА збівалі з дапамогай С-400 "Трыумф", і ён упаў на тэрыторыі завода "Неўскі мазут". Паводле звестак выдання, загарэліся тры пустыя цыстэрны. Пажар ужо патушылі. Абломкі беспілотніка таксама пашкодзілі некалькі машын, прыпаркаваных на тэрыторыі завода. Паводле звестак тэлеграм-канала Mash, гэты беспілотнік спрабавалі збіць яшчэ ў 60 км ад Пецярбурга. Але беспаспяхова.
Губернатар горада Аляксей Бяглоў пазней паведаміў, што "ўначы жыхары кварталаў у раёне Глухаазёрскай шашы чулі гучны ўдар". Паводле яго версіі, "адбыўся інцыдэнт, які запатрабаваў увагі сілавых ведамстваў". Пацярпелых няма, і "істотна маёмасць не пашкодзілі".
Нагадаем, на мінулым тыдні ў Расіі гарэў нафтаперапрацоўчы завод у Туапсэ. Мясцовыя СМІ тады пісалі, што пажар пачаўся пасля ўдару беспілотніка. А 19 студзеня пасля атакі БПЛА здарыўся пажар на нафтабазе ў горадзе Клінцы Бранскай вобласці.
