На штраф ЛГБТ-актывістцы сабралі ўдвая больш, чым трэба
На сайце Talaka.org сабралі больш за 900 рублёў для аштрафаванай ЛГБТ-актывісткі Вікі Біран.
Суд Цэнтральнага раёну сталіцы 16 ліпеня аштрафаваў Віку на 367,5 рубля (15 базавых велічыняў). Дзяўчыну прызналі вінаватай у арганізацыі масавага мерапрыемства.
Падставай для гэтага стаў адзіночны флэш-моб, які Біран зладзіла 24 траўня. З плакатам "Самі вы падробка" яна сфатаграфавалася каля будынкаў Дома ўраду, Міністэрства ўнутраных спраў і Камітэта дзяржбяспекі. Здымкі былі апублікаваныя ў сацсетках.
Гэтая акцыя была выкліканая папярэднімі гамафобнымі заявамі МУС і кіраўніка ведамства Ігара Шуневіча.
Дарэчы, за гэтую ж самую акцыю Віку Біран будуць судзіць яшчэ раз — 23 ліпеня ў судзе Маскоўскага раёна Мінску.
