На Мядзелшчыне мужчына месяц хаваўся ў лесе пасля спробы забіць дзвюх жанчын
Больш за месяц хаваўся ў лесе 47-гадовы Валянцін Сяргей пасля спробы забіць сястру і яе сяброўку, перадае БЕЛТА са спасылкай на УУС Мінаблвыканкама.
Спроба забойства адбылася ўвечары 10 ліпеня ў вёсцы Коркі Мядзелскага раёна. Мужчына ўдарыў нажом у шыю сваю сястру і яе сяброўку. Потым ён хаваўся ў лясах або ў закінутых дамах Мядзелшчыны.
Следчы камітэт пачаў на мужчыну крымінальную справу за замах на забойства дзвюх асоб. Шукалі яго супрацоўнікі міліцыі і Следчага камітэта.
Увечары 22 жніўня міліцыянты знайшлі і затрымалі падазраванага. Падчас пошукаў яны вызначылі участак, дзе меркавана хаваўся ўцякач — больш за 30 га лесу і балотаў. Мужчына вельмі добра ведаў мясцовасць, што ўскладняла яго пошук. "Для яго пошукаў выкарыстоўваліся верталёт, цеплавізары, тэхнічнае спрыянне аказвалі работнікі нацыянальнага парку "Нарачанскі" , — паведаміў часовы выканаўца абавязкаў начальніка Мядзелскага РАУС Уладзімір Ермаловіч.
Часам мужчыну заўважалі мясцовыя жыхары, аднак ён адразу пры выглядзе чалавека адразу ўцякаў у лес. У той жа час праваахоўнікі выявілі, што падазраваны перыядычна начуе ў нежылых дамах. Яны ставілі засады каля гэтых дамоў, а таксама бліз дарог, дзе мужчына мог прадаваць сабраныя ім грыбы і ягады.
Урэшце ўдача была на баку міліцыянтаў. Засада, пакінутая каля аднаго з хутароў бліз вёскі Дубнікі, заўважыла і затрымала падазраванага.
Цяпер мужчына знаходзіцца ў ізалятары часовага ўтрымання, з ім працуюць следчыя.
