На месцы крушэння малазійскага Боінга знайшлі новыя чалавечыя парэшткі

У часе вывазу абломкаў збітага ў ліпені Боінга кампаніі “Малазійскія авіялініі” знайшлі парэшткі загінулых. Пра гэта 16 лістапада паведаміў журналістам кіраўнік МНС самаабвешчанай Данецкай народнай рэспублікі Аляксей Каструбіцкі.

У нядзелю ў населеным пункце Грабава Данецкай вобласці пачаліся працы па вывазе абломкаў самалёта. Эксперты з Нідэрландаў пазначаюць часткі лайнера, падрыхтаваныя для вывазу, спецыяльнай фарбай, пасля чаго іх апісваюць і грузяць на аўтамабілі, паведамляе ТАСС.

Праца галандскіх экспертаў на месце крушэння самалёта рэгламентуецца пратаколам, падпісаным Нідэрландамі, АБСЕ і гэтак званай ДНР.
Самалёт кампаніі “Малазійскія авіялініі” быў збіты 17 ліпеня. Усе 298 чалавек, якія знаходзіліся на борце, загінулі. Пераважная большасць ахвяраў трагедыі былі грамадзянамі Нідэрландаў.