На банкруцтва падаў уладальнік FM-станцый "Радыё Бі-Эй" і "Мелодыі стагоддзя"
![Студыя радыёстанцыі, ілюстрацыйнае фота](/sites/default/files/styles/gallery_main/public/2024-04/radio-1204.jpg.webp?itok=1YDvjnxr)
Студыя радыёстанцыі, ілюстрацыйнае фота / pixabay.com
Заяву на банкруцтва ў эканамічны суд падала кампанія "АНВІК" бізнесоўца Яўгена Шарашэўскага, піша Office Life. Яе запазычанасць перад крэдыторамі складае крыху больш за 173 тысячы рублёў.
Вяшчанне FM-станцый "Радыё Бі-Эй" і "Мелодыі стагоддзя" спынілася больш за год таму. 2 лютага 2023 года ўласнік падпісаў рашэнне аб ліквідацыі, але не здолеў разлічыцца з пазыкамі.
Паводле даных суда, у кампаніі няма ніякіх іншых актываў, акрамя дэбіторскай запазычанасці амаль на 110 тысяч рублёў. Таму на 10 ліпеня прызначылі пасяджэнне аб банкруцтве.
"Радыё Бі-Эй" была адной з найбуйнейшых беларускіх FM-станцый. Яна пачала вяшчанне ў 1993 годзе. У 2023-м слухаць эфіры радыёстанцыі можна было больш чым у 100 гарадах краіны.
Радыёстанцыя "Мелодыі стагоддзя" першая сярод беларускіх стала працаваць у фармаце рэтра.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.