На 11 гадоў калоніі асудзілі "рэйкавага партызана" з Асіповічаў
![Пасля пачатку вайны ў Беларусі пачалі адбывацца дыверсіі на чыгунцы / ілюстрацыйнае фота РІА "Новости"](/sites/default/files/styles/gallery_main/public/2023-08/gd_13_11.jpg.webp?itok=bVGFg_fn)
Пасля пачатку вайны ў Беларусі пачалі адбывацца дыверсіі на чыгунцы / ілюстрацыйнае фота РІА "Новости"
На 11 гадоў калоніі асудзіў Магілёўскі абласны суд жыхара Асіповічаў Аляксея Шышкаўца. Яго абвінавачвалі ў тэрарызме (арт. 289 КК РБ) і ва ўдзеле на тэрыторыі замежнай дзяржавы ва ўзброеным фарміраванні (ч.3 арт. 361 КК РБ). Справу разглядаў суддзя Сяргей Мазураў, паведамляюць праваабаронцы.
Паводле версіі следства, у пачатку гэтага года Шышкавец "увайшоў у склад экстрэмісцкага фарміравання ByPol". Мужчына зарэгістраваўся ў чат-боце "для здзяйснення супрацьпраўных дзеянняў у Беларусі". А 1 сакавіка ён нібыта атрымаў указанні па блакаванні чыгуначных шляхоў, а таксама па вырабе і выкарыстанні "кактэйляў Молатава".
"Ён выказаў актыўную гатоўнасць садзейнічаць акцыям прамога дзеяння на аб'ектах чыгункі ў раёне горада Асіповічы з мэтай правядзення дыверсій і недапушчэння прасоўванняў эшалонаў з ваеннай тэхнікай", — казаў раней начальнік Магілёўскага ўпраўлення ГУБАЗіК Міхаіл Сухачоў.
КДБ унёс Шышкаўца ў "спіс тэрарыстаў", а праваабаронцы — у спіс палітвязняў.
Пасля пачатку расійскай агрэсіі супраць Украіны пачалі адбывацца дыверсіі на беларускіх чыгунках. У шэрагу рэгіёнаў было знішчанае сігнальнае абсталяванне, а чыгуначныя шляхі блакаваліся.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.