МУС: журналіст Андрэй Скурко знаходзіцца пад дынамічным наглядам медыкаў

Супрацоўнік "Нашай Нівы" Андрэй Скурко ў СІЗА №1 "знаходзіцца пад дынамічным наглядам медыцынскіх работнікаў" і атрымлівае меддапамогу ў поўным аб’ёме. Пра гэта гаворыцца ў адказе МУС на заяву Беларускай асацыяцыі журналістаў. 

На мінулым тыдні стала вядома, што зняволены Скурко захварэў у СІЗА і быў змешчаны ў медычную частку. З улікам таго, што журналіст з'яўляецца інсуліназалежным дыябетыкам, БАЖ прасіла перавесці Скурко ў грамадзянскую лякарню.

У адказе Дэпартамент выканання пакаранняў МУС спасылаецца на лекарскую таямніцу і таму не паведмаляе пра стан здароўя Скурко. 

З уласных крыніц супрацоўнікі БАЖ даведаліся, што зняволены журналіст сапраўды ідзе на папраўку.

Супрацоўнікі "Нашай Нівы" Ягор Марціновіч і Андрэй Скурко знаходзяцца за кратамі з 8 ліпеня. На іх пачалі крымінальную справу за нібыта няправільна аплочаныя камунальныя плацяжы.