Мінздароўя: новы антырэкорд статыстыкі па колькасці памерлых ад COVID-19

Мінздароўя Беларусі апублікавала чарговую статыстыку па сітуацыі з каранавірусам у Беларусі.

Як сцвярджае міністэрства, зарэгістраваныя 1992 пацыенты з COVID-19, выпісаныя 2158.

А вось па колькасці памерлых у афіцыйнай статыстыцы антырэкорд: 18 чалавек за суткі. Паводле дадзеных Мінздароўя, за ўвесь перыяд распаўсюджвання інфекцыі на тэрыторыі краіны памерлі 4614 пацыентаў.

Дактары канстатуюць, што падчас «чацвёртай хвалі» пандэміі COVID-19 з'явіліся новыя групы пацыентаў, якія цяжка пераносяць каранавірус. Да людзей старэйшага ўзросту і пацыентаў з хранічнымі захворваннямі дадаліся дзеці, маладыя людзі і цяжарныя. Мінздароўя заклікае ўсіх праходзіць вакцынацыю.