Мінпрацы прызнала, што колькасць занятых у эканоміцы Беларусі скарачаецца
![Міністр працы і сацыяльнай абароны Ірына Касцевіч / 1prof.by](/sites/default/files/styles/gallery_main/public/2023-08/Kostevich-3_04.jpg.webp?itok=5nR84tOa)
Міністр працы і сацыяльнай абароны Ірына Касцевіч / 1prof.by
Колькасць занятых у эканоміцы Беларусі скарацілася, прызнала міністр працы і сацыяльнай абароны Ірына Касцевіч. "Вядома, назіраецца, на мой погляд, такая адмоўная дынаміка па занятых у эканоміцы. Мы скарачаемся", — заявіла яна ў эфіры СТВ. Па словах міністра, на скарачэнне колькасці занятых ўплываюць два фактары: дэмаграфічны і эканамічны (санкцыі).
Праз санкцыі "бізнэс стаў актыўна аптымізаваць свае працэсы", лічыць "заробленыя капейкі", кажа міністр. . Пры гэтым "нейкіх глабальных, сур'ёзных праблем на рынку працы няма", лічыць яна.
Белстат фіксуе зніжэнне колькасці занятых у эканоміцы ўжо некалькі гадоў. За апошнія тры гады гэтая колькасць скарацілася больш чым на 150 тысяч чалавек.
За мінулы год насельніцтва Беларусі зменшылася амаль на 55 тысяч чалавек. А за тры гады — на 200 тысяч. Мінск у 2023 годзе перастаў быць двухмільённым горадам. На 1 студзеня ў сталіцы пражывала 1 995 471 чалавек. За год насельніцтва сталіцы зменшылася больш чым на тысячу жыхароў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.