Міністр аховы здароўя паведаміў Лукашэнку, што эпідэміі грыпу не будзе

Аляксандр Лукашэнка патрабуе, каб не было неабгрунтаванага росту коштаў на лекі. Пра гэта ён паведаміў 15 лютага міністру аховы здароўя Васілю Жарко, калі прымаў яго з дакладам.

Кіраўнік Беларусі выказаў занепакоенасць, што вытворцы і асабліва гандаль будуць старацца паступова падымаць кошты, бо людзі будуць купляць лекі.

"Гэта недапушчальна. Вядома, я не за тое, каб мы загналі аптэкі або іншых вытворцаў у страты. У адваротным выпадку мы будзем вымываць наменклатуру тавараў і лекаў, мы страцім гэтую наменклатуру. Ніхто ў страту працаваць не будзе, але і нажывацца за кошт гэтага, асабліва гандлёвым арганізацыям, дазволіць нельга", — перадае БЕЛТА словы Лукашэнкі. Ён дадаў, што сітуацыю з коштамі ў аптэках трэба кантраляваць і надалей.

У сваю чаргу міністр аховы здароўя распавёў, што перадумоў для абвяшчэння эпідэміі грыпу ў Беларусі няма.

Жарко: "Сітуацыя па захворванні і прастудных захворваннях, у тым ліку і на грып, у нас знаходзіцца на нізкім узроўні. Нават калі браць у параўнанні з мінулым годам, то на сённяшні дзень на 10% ніжэй, чым у мінулым годзе. У нас няма эпідэміі і нават яе не намячаецца".

Па словах Жарко, якія перадае СТВ, у апошнія два тыдні ў Беларусі быў невялікі рост захворванняў на грып, але гэта штогадовая з'ява.