Міхаіл Грабоўскі зрабіў першы хет-трык у кар'еры (відэа)

Міхаіл Грабоўскі зрабіў першы хет-трык у сваёй заакіянскай кар'еры. Гэта здарылася ўжо ў першым матчы 97-га чэмпіянату Нацыянальнай хакейнай лігі, які адбыўся сёння ноччу.

На жаль, “Вашынгтон”, за які гуляе беларускі форвард, прайграў цяперашняму ўладальніку Кубка Стэнлі “Чыкага” з лікам 4:6.

Грабоўскі акрамя трох забітых галоў яшчэ і аддаў галявую перадачу, паўдзельнічаўшы такім чынам пры кожным узяцці варот саперніка. У выніку беларус быў прызнаны другой зоркай матчу.

Адзначым, што раней з беларускага дэсанту за акіянам тры галы за матч удавалася забіць толькі Андрэю Касціцыну ("Манрэаль") і яго брату Сяргею ("Нэшвіл").

У цяперашнім розыгрышы Кубка Стэнлі Міхаіл Грабоўскі застаўся адзіным прадстаўніком нашай краіны ў НХЛ. Браты Касціцыны гэты сезон праводзяць у Кантынентальнай хакейнай лізе.

Фота — belarushockey.com