Марадона падтрымаў Мадура пасля замаху: “Моцы табе, дарагі сябра!”
Старшыня праўлення футбольнага клуба “Дынама” (Брэст) Дыега Марадона адрэагаваў на навіну пра спробу замаху на прэзідэнта Венесуэлы Нікаласа Мадура.
“Замах на Нікаласа Мадура — гэта замах на народ! Венесуэла не здаецца. Моцы табе, дарагі сябра!” — напісаў аргенцінскі футбаліст у сябе ў Твітэры.
Спроба замаху на прэзідэнта Венесуэлы адбылася ў суботу ў Каракасе на святочным парадзе з нагоды 81-годдзя стварэння нацыянальнай гвардыі. Прэзідэнт Мадура выступаў там з прамовай, калі на яго скіраваліся два дроны, начыненыя выбухоўкай С4. Дроны не даляцелі на прэзідэнцкай ложы — іх збілі снайперы, паведамляюць замежныя інфармагенцтвы. Служба аховы закрыла прэзідэнта бронематамі, а затым эвакуявала.
