Макей — пра ЛГБТ-сцяг: Не навязвайце нам рэчы, якія ўстаяліся ў іншых краінах
Разам з тым міністр замежных спраў заявіў, што кожны палітычны дзеяч мусіць думаць пра наступствы сваіх публічных заяваў.
На форуме "Мінскі дыялог" журналісты папрасілі міністра замежных спраў Уладзіміра Макея пракаментаваць нядаўнія заявы Міністэрства ўнутраных спраў.
Як вядома, 20 траўня МУС выступіла з заявай, у якой асудзіла вывешванне вясёлкавага сцяга сэксуальных меншасцяў на амбасадзе Вялікабрытаніі. Заява МУС атрымала шырокі розгалас у Беларусі і за мяжой.
"Звяртайцеся да МУС Беларусі", — адказаў Макей журналістам, якія прасілі адказаць, чаму МУС робіць замежнапалітычныя заявы замест МЗС.
Аднак кіраўнік дыпламатыі выказаў сваё прыватнае меркаванне: "Усялякі дзяржаўны, палітычны дзеяч, любая структура, робячы тыя ці іншыя заявы, павінна думаць пра наступствы ва ўсіх адносінах, больш шырокага маштабу".
Разам з тым Макей заклікаў "не навязваць" Беларусі рэчы, "непрымальныя для нашага мэнталітэту": "Я лічу, што, узаемадзейнічаючы з Еўрасаюзам ды іншымі дзяржавамі ў сферы правоў чалавека, мы мусім улічваць спецыфіку, менталітэт той ці іншай дзяржавы і народу. Рухацца і вырашаць пытанні заўжды трэба вельмі асцярожна. Ёсць шэраг рэчаў, якія абсалютна непрымальныя для нашага менталітэту, для нашай краіны. Гэта датычыць не толькі Беларусі і шэрагу іншых краінаў. Маё меркаванне — не трэба навязваць тыя ці іншыя рэчы, якія ўжо даўно ўстаяліся ў нейкіх краінах".