Макей: Беларусь паніжае ўзровень удзелу ва "Усходнім партнёрстве"

Макей кажа, што ўлады Беларусі пашырылі свой персанальны "чорны спіс", у які трапілі "адпаведныя асобы з усіх краін Еўрасаюза". Афіцыйны Мінск прапануе прыпыніць працу каардынацыйнай групы "Беларусь — Еўрасаюз".

"Мы бачым, што ёсць спробы палітызаваць шэраг інфраструктурных, міжрэгіянальных праектаў у рамках гэтай ініцыятывы ["Усходняга партнёрства"], — цытуе словы міністра замежных спраў БЕЛТА. — Таму прынята рашэнне аб паніжэнні ўзроўню ўдзелу Беларусі ў гэтай ініцыятыве да экспертнага". Рашэнне было прынята на нарадзе ў Лукашэнкі.

"Вакол нашай краіны сышліся інтарэсы шэрагу геапалітычных гульцоў і адбываецца адкрытая геапалітычная барацьба, як бы хто ні спрабаваў гэта адмаўляць, — таксама заявіў Уладзімір Макей. — Таму нам даводзіцца рэагаваць на тыя непажаданыя для нас выклікі і пагрозы, якія ўзнікаюць вакол Беларусі".