Лукашэнка загадаў абагнаць Кітай па росце ВУП
Прэзідэнт Беларусі запатрабаваў дамагчыся больш высокага паказчыку валавога ўнутранага прадукта, паведамляе БЕЛТА. Прагнозы ўрада не задавальняюць Аляксандра Лукашэнка Аб гэтым ён сёння заявіў на нарадзе па выніках сацыяльна-эканамічнага развіцця краіны за 9 месяцаў бягучага года, а таксама праектах прагнозу развіцця, бюджэту і асноўных кірункаў грашова-крэдытнай палітыкі на наступны год.
"Мы спрачаемся, які ВУП павінен быць у 2008 годзе. Пры такім высокім попыце на нашу прадукцыю прырост ВУП павінен быць 20%", — сказаў кіраўнік дзяржавы. Ён падкрэсліў, што нарастаючае адмоўнае сальда замежнагандлёвай дзейнасці пагражае развіццю беларускай эканомікі.
"Калі ў наступным годзе рост адмоўнага сальда працягнецца цяперашнімі тэмпамі, пад пагрозай апынуцца ўсе нашы дасягненні", — адзначыў Лукашэнка.
Між тым, па цяперашніх тэмпах росту ВУП (8,4%) Беларусь ужо пераўзыходзіць Францыю (там ВУП вырас толькі на 2-2,5%) і ЗША, якія радуюцца 3,9%-му росту. Больш за тое, нашай краіне амаль нічога не засталося, каб дагнаць Расію (усяго 0,2%). І ужо думаем, як перагнаць Кітай (11,5%).
