Лукашэнка хоча зраўнаваць дзяцей з заможных і бедных сем’яў
15 жніўня Аляксандр Лукашэнка праводзіць працоўную сустрэчу па пытаннях адукацыі. Кіраўніка Беларусі цікавіць, як праходзяць школьныя кірмашы і ці па кішэні падрыхтоўка да навучальнага года малазабяспечаным сем'ям і дзецям-сіротам.
"Формула адна — каб 1 верасня дзеці былі аднолькавыя, — заўважае Лукашэнка. — Не ў тым плане, што яны павінны быць апранутыя ў чорна-белыя фартушкі, гольфы або сукеначкі. А каб не вылучаліся дзеці з сем'яў, якія не такія заможныя сёння. Мы павінны апрануць годна да 1 верасня ўсіх дзетак".
Незадавальненне Лукашэнкі выклікае павольнае, на яго думку, абнаўленне навучальных праграм і школьных падручнікаў.
"Ніякай праблемы ў гэтым не бачу. Нават у тэрмінах, — кажа Лукашэнка. — Мы ж не нанова ствараем падручнікі, навучальныя праграмы. У асноўным гэта нармальныя навучальныя праграмы і падручнікі. Але некаторыя тэмы, як выявілася, трэба карэктаваць".
Нагадаем, у лютым Аляксандр Лукашэнка даручыў па-іншаму адлюстраваць у новых падручніках гісторыю станаўлення беларускай дзяржавы. Сваю канцэпцыю кіраўнік Беларусі назваў “здаровы нацыяналізм”.
Мінадукацыі абяцала да 1 верасня абнавіць усе вучэбныя праграмы для сярэдняй школы. Але, па словах міністра адукацыі Ігара Карпенкі, пад гэтыя новыя праграмы не па ўсіх дысцыплінах сёлета паспеюць распрацаваць падручнікі.
