Луцэнка абяцае з ганьбай звольніць тых, хто "зліў" відэа забойцаў Шарамета
Тыя, хто перадаў у СМІ відэа з камераў назірання, зробленае за некалькі гадзін да забойства Паўла Шарамета, будуць з ганьбай звольненыя з праваахоўных органаў. З такой заявай генпракурор Украіны Юрый Луцэнка выступіў у тэлеэфіры "112 канала".
Гэтае відэа было абнародаванае ўкраінскімі СМІ 22 ліпеня. На роліку відаць, што выбухоўку пад аўтамабіль "Субару", у якім узарваўся журналіст Шарамет, падклала жанчына. Разам з ёй працаваў таксама мужчына.
Луцэнка заявіў, што вельмі раззлаваўся, калі даведаўся пра з'яўленне роліка ў інтэрнэце: "Пытанне нават не ў законнасці ці незаконнасці — вядома, гэта незаконна. Але гэта проста забівае таямніцу следства і вельмі ўскладняе задачу праваахоўных органаў".
У сваю чаргу міністр унутраных спраў Украіны Арсен Авакаў заклікаў палітыкаў не раскрываць факты і зачэпкі справы, а таксама не тыражаваць здагадкі. Па яго словах, якія перадае УНІАН, расследаваннем займаюцца кампетэнтныя следчыя Нацыянальнай паліцыі разам са спецыялістамі крымінальнага вышуку. Ім дапамагаюць эксперты Федэральнага бюро расследаванняў ЗША.
