Ліцэю БДУ ўсё ж такі нададуць імя Дзяржынскага
Фелікс Дзяржынскі ў 1912 годзе
Ліцэю БДУ ўсё ж такі нададуць імя Фелікса Дзяржынскага.
Чуткі, пра якія Еўрарадыё даведалася першым, пацвердзіліся сёння на сустрэчы дырэктаркі ліцэя Таццяны Мамчыц з кіраўніцтвам БДУ.
Яна перадала рэктару Андрэю Каралю “калектыўны зварот супрацоўнікаў ліцэя” з прапановай надаць навучальнай установе імя “выдатнага ўраджэнца беларускай зямлі” Фелікса Дзяржынскага.
Фелікс Дзяржынскі сапраўды нарадзіўся ў Беларусі. Але найбольшую вядомасць ён набыў як стваральнік і першы кіраўнік ЧК — Надзвычайнай камісіі па барацьбе з сабатажам контррэвалюцыяй. Пры ім былі створаныя першыя савецкія канцлагеры, а сама ЧК набыла крывавую славу.
Дарэчы, у першыя гады савецкай улады Дзяржынскі ўзначальваў таксама камісію па барацьбе з беспрытульнасцю. Можа, гэта натхніла дырэктарку Ліцэя БДУ на новае найменаванне ўстановы?
