Ліберальна-дэмакратычная партыя дала грошы на Таварыства беларускай мовы
На днях адбылася сустрэча кіраўніка ТБМ Алега Трусава з кіраўніцтвам ЛДП. Партыйцы паабяцалі не толькі фінансавую падтрымку, але і ўдзел у супольных мерапрыемствах.
У каментары Еўрарадыё Алег Трусаў распавёў:
Трусаў: "Дапамога была нармальная — два мільёны рублёў. Была сустрэча з кіраўніцтвам партыі, выступаў малады Гайдукевіч — мой цёзка, Алег. Ён казаў, што кожны беларус павінен мову ведаць, што сам ён мову разам з дачкой сваёй вывучае і неўзабаве будзе ўсюды гаварыць па-беларуску. А самы беларускамоўны быў мой стары знаёмы Крыжаноўскі — мы ведаем адзін аднаго яшчэ з Купалаўскага тэатра".
Па словах Трусава, партыйцы прапанавалі таксама свой удзел у мерапрыемствах Таварыства беларускай мовы. Акрамя таго, кіраўніцтва ЛДП паабяцала падпісацца на газеты "Новы час" і "Наша слова".
Фота — прэс-служба ЛДП
