Краіны Балтыі дамовіліся пра адзіныя правілы мытнага кантролю па Беларусі і РФ
Сцягі Эстоніі, Латвіі і Літвы / pixabay.com
Краіны Балтыі будуць ужываць аднолькавыя меры кантролю па выкананні санкцый у дачыненні да Беларусі і Расіі. 26 студзеня кіраўнікі мытняў Літвы, Латвіі ды Эстоніі зацвердзілі адпаведнае пагадненне Балтыйскага рэгіёну, піша "Новая газета. Еўропа" са спасылкай на літоўскую мытню.
18 снежня 2023 года прэм'ер-міністры краін Балтыі зацвердзілі Дэкларацыю. У гэтым дакуменце кіраўнікам мытняў трох балтыйскіх краін даручаецца да 31 студзеня 2024 года стандартызаваць мытны дагляд у рамках санкцый ЕС.
Мытні краін Балтыі ўзмоцняць кантроль над падсанкцыйнымі таварамі, якія вывозяцца праз Расію ці Беларусь у трэція краіны. Мытні трох краін будуць прымяняць агульныя меры — напрыклад, патрабаванне прадаставіць дакумент або інфармацыю, так званую дэкларацыю вытворцы.
Таксама мытні зробяць больш строгімі ўмовы афармлення экспартных (рээкспартных/транзітных) працэдур пры экспарце (рээкспарце) тавараў.
