КНР і сусветная супольнасць выказаліся пра вайну — год з пачатку агрэсіі

Сёння спаўняецца год з моманту поўнамаштабнага ўварвання Расіі ва Украіну. Да гадавіны вайны выказацца нарэшце вырашыў Кітай. Але пазіцыя Пекіна зноў засталася не ясная. Усе 12 пунктаў плана вытрыманыя ў стрыманых закліках: паважаць суверэнітэт усіх краін, спыніць ваенныя дзеянні, аднавіць мірныя перамовы, адмовіцца ад "менталітэту халоднай вайны" і гэтак далей.

Дакумент называецца "пазіцыя Кітая па палітычным ўрэгуляванні ўкраінскага крызісу". Раней кітайскі амбасадар у ААН Чжан Цзюнь, калі анансаваў дакумент, папярэдзіў, што кітайскі бок не называе яго мірным планам. "Гэта пазіцыйны дакумент. Галоўным чынам мы будзем заклікаць да міру, да дыялогу, да мірнага ўрэгулявання", — казаў тады ён, нагадвае Hromadske.

Тым часам у Генасамблеі ААН прынялі рэзалюцыю з заклікам да Расіі вывесці войскі з тэрыторыі Украіны. Акрамя таго, у дакуменце замацавалі "формулу міру", якую сфармуляваў Уладзімір Зяленскі. Дакумент падтрымала 141 краіна са 193. Супраць выказаліся прадстаўнікі сямі краін — Беларусі, Малі, Нікарагуа, Расіі, Сірыі, Паўночнай Карэі і Эрытрэі. Яшчэ 32 дзяржавы (у тым ліку Індыя і Кітай) устрымаліся.

ЗША абвясцілі аб новым пакеце вайсковай дапамогі Кіеву на суму 2 мільярдаў долараў. Новае фінансаванне будзе накіравана на закупкі і вытворчасць для Украіны: ракет для HIMARS; 155 мм артылерыйскіх боепрыпасаў; абсталявання для процідзеяння беспілотнікам, а таксама для размініравання і бяспечнай сувязі. Частка сродкаў пойдзе на фінансаванне навучання і абслугоўвання, піша Reuters.

Выдзяленне дапамогі пацвердзіў дарадца Белага дома па пытаннях нацыянальнай бяспекі Джэйк Саліван. У яго таксама спыталі пра амерыканскія знішчальнікі F-16, якія просіць Украіна. Калі коратка, то пакуль не. "F-16 — гэта не пытанне для кароткатэрміновай барацьбы. F-16 — гэта пытанне для доўгатэрміновай абароны Украіны", — сказаў ён.

Саліван таксама быў госцем дыскусіі, якую арганізаваў да гадавіны пачатку вайны тэлеканал CNN. Там ён заявіў, што, як бы ні развіваліся падзеі ў далейшым, Расія ўжо прайграла вайну з Украінай. "Мэтай Расіі ў гэтай вайне было сцерці Украіну з карты, узяць сталіцу і знішчыць Украіну, паглынуць яе. Яны пацярпелі правал, і ў далейшым ужо не будуць здольныя дасягнуць гэтых мэтаў", — адзначыў Саліван.

З пачатку вайны расіяне нанеслі па тэрыторыі Украіны амаль 5 тысяч ракетных удараў, 3,5 тысяч авіяцыйных, а таксама больш за 1,1 тысячы удараў дронамі. Такія лічбы да гадавіны агучыў намеснік начальніка ГУ уркаінскага Генштаба Аляксей Громаў, піша УНІАН.

На фронце тым часам без істотных пераменаў. Расіяне спрабуюць наступаць у Луганскай і Данецкай абласцях: на Купянскім, Ліманскім, Бахмуцкім, Аўдзееўскім і Шахцёрскім кірунках. За мінулыя суткі Сілы абароны Украіны адбілі каля 100 расійскіх нападаў на гэтых напрамках. "Пры гэтым расійскія акупанты нанеслі 10 ракетных і 31 авіяцыйны ўдар", адзначаюць украінскія вайскоўцы. Пацярпелі грамадзянскія аб'екты Харкаўскай вобласці і Херсонскай вобласці. Ёсць загінулыя і параненыя сярод мірных жыхароў.

Напярэдадні ўвечары ў выніку расійскага ўдару быў пашкоджаны магістральны трубаправод. Ён забяспечваў ацяпленне каля 600 дамоў. Гэта больш за 40 тысяч чалавек. Пра гэта распавёў у вячэрнім відэазвароце прэзідэнт Украіны Уладзімір Зяленскі.

"Рамонтныя работы будуць працягвацца без перапынку, пакуль не будзе адноўлена забеспячэнне цяпла. І мы адновім!", — паабяцаў кіраўнік украінскай дзяржавы. Аб крытычнай сітуацыі з ацяпленнем напярэдадні гаварыў Кіраўнік Херсонскай абласной ваеннай адміністрацыі Аляксандр Пракудзін. Паводле яго слоў, праблема ўзнікла пасля абстрэлу расійскіх войскаў. Херсонскія ўлады параілі жыхарам падрыхтаваць абагравальнікі і цёплыя рэчы.

А сёння Зяленскі звярнуўся да ўкраінцаў у сувязі з гадавінай вайны. Сказаў, што гэта быў "год нашай з вамі нязломнасці. Ведаем, што 2023 будзе годам нашай з вамі перамогі".

Сёння ў гадавіну расійскага ўварвання над Рэйхстагам падымуць сцяг Украіны. Украінскі сцяг таксама з'явіцца на палацы Бельвю, які займае прэзідэнт Германіі, і на будынку ведамства федэральнага канцлера Германіі. Чакаецца, што да акцыі далучацца і некаторыя федэральныя міністэрствы.

Агульнанацыянальную хвіліну маўчання абвясціць сёння і ўрад Вялікабрытаніі і Паўночнай Ірландыі. А мінулай ноччу ў колеры ўкраінскага сцяга афарбаваўся будынак Еўрапарламента ў Брусэлі. Сінім і жоўтым колерам ў гадавіну поўнамаштабнага ўварвання РФ ва Украіну падсвяцілі і Эйфелеву вежу ў Парыжы.