Вы тут

Кіраўнік УЕФА расказаў пра стаўленне да беларускага чэмпіянату падчас пандэміі

Аляксандар Чэферын / Reuters

УЕФА не давала ніякіх рэкамендацыяў краінам наконт правядзення або спынення футбольных чэмпіянатаў падчас пандэміі каранавіруса. Пра гэта кіраўнік УЕФА Аляксандар Чэферын расказаў у інтэрв'ю TUT.by. 

Як вядома, падчас распаўсюду COVID-19 наша краіна была адзінай у рэгіёне, якая не спыніла футбольныя спаборніцтвы. 

"На гэты конт з боку УЕФА не давалася ніякіх афіцыйных рэкамендацый. Але наша пазіцыя па гэтым пытанні была вельмі зразумелай — здароўе і бяспека ўсіх футбалістаў і іншых удзельнікаў гульні павінны быць нашым галоўным прыярытэтам. 

Як вы ведаеце, УЕФА цалкам выконвае прынцып аўтаномнасці сваіх асацыяцый-чальцоў і не можа ўмешвацца ў сферу іх юрысдыкцыі. Гэта было сумеснае рашэнне федэрацыі футбола Беларусі і дзяржаўных уладаў, і мы яго паважаем", — патлумачыў Чэферын.

Наконт плэй-оф Еўра-2020 (Беларусь у ім сустракаецца са зборнай Грузіі) кіраўнік УЕФА паведаміў, што выканкам арганізацыі зможа прыняць пастанову наконт тэрмінаў правядзення на сваім наступным пасяджэнні 17 чэрвеня. 

Згадаў Чэферын і пра сваю асабістую сустрэчу з Аляксандрам Лукашэнкам год таму. Раскрываць нейкія дэталі сустрэчы ён адмовіўся — маўляў, яна была прыватнай. "Больш я не магу нічога дадаць, за выключэннем таго, што гэта была прыемная і цікавая сустрэча. Мы казалі пра шматлікія рэчы, і я быў прыемна здзіўлены, як шмат часу прэзідэнт Лукашэнка надае футболу і спорту ў цэлым", — дадаў кіраўнік УЕФА.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.