Вы тут

Кіраўніцтва каліноўцаў наехала на BYSOL за збор грошай для палка "Пагоня"

Аўтамабіль, набыты для каліноўцаў фондам RazomForUkraine / арыгінальнае фота

Кіраўніцтва атраду імя Кастуся Каліноўскага незадаволенае зборам сродкаў, які фонд BYSOL абвясціў для палка "Пагоня". "Недавер" да абвешчанага нядаўна збору на атрад беларускай авіяразведкі быў заяўлены праз тг-канал "Беларускага дома ва Украіне". Вось што там сказана:

Нам присылают все больше подозрительных сборов на беларуских воинов. Самый странный из них мы решили опубликовать. 

Фонд BYSOL собирает деньги на группу беларуских авиаразведчиков. Отряд создаёт беларуская общественная организация Prague Support Team. Что нам показалось странным:

— общественная организация из Чехии создаёт новое подразделение. Имеет ли она на это полномочия?

— обучать их планируют в Праге и за немалые деньги. Вряд ли там есть инструктора с боевым опытом российско-украинской войны. При этом есть возможность обучаться в Украине и бесплатно;

— не названо ни одно имя человека, представляющего этот отряд; 

— не названа бригада ВСУ, к которой эта группа будет относиться.

И самое главное:
 
— СБУ, ГУР а так же ВСУ не в курсе о существовании этого формирования.

Мы, Беларуский Дом в Украине, заявляем о недоверии к этому сбору.

Скрыншот поста з абвінавачаннямі ў бок BYSOL і Prague Support Team

Якое дачыненне "Беларускі дом ва Украіне" мае да палка імя Каліноўскага? Чаму абвестка пра "недавер" з'явілася менавіта ў гэтым тг-канале? Справа ў тым, што вярхі БДУ шчыльна звязаныя з кіраўніцтвам палка імя Кастуся Каліноўскага. Камунікацыя адбываецца праз Радзівона Батуліна — у свой час сузаснавальніка БДУ, а цяпер і байца палка.

Звяртае на сябе ўвагу, што аўтары наезду не палічылі неабходным узяць каментары ні ў BYSOL, ні ў Prague Support Team. Між тым і тыя, і другія былі гатовыя даць любыя тлумачэнні па зборы.

"Не, хлопцы, так не працуе. Спачатку накінуць, а потым разбірацца — гэта дзіцячы садок, — адказвае кіраўнік Андрэй Стрыжак. — У чаце ёсць Кірыл Якімовіч [кіраўнік Prague Support Team. — Еўрарадыё], ён адкажа на пытанні па групе. Нашая пляцоўка адкрыта да любых верыфікаваных збораў".

"Як і большасць байцоў "Пагоні", атрад авіяразведкі падпісвае кантракты з УСУ і будзе служыць у складзе Першай асобнай брыгады спецпрызначэння імя Івана Багуна. Вельмі непрыемна назіраць за нападкамі на нашую працу і на працу нашых дыяспар і добраахвотнікаў", — у сваю чаргу каментуе Якімовіч.

"У нас ёсць канкрэтныя дамоўленасці з УСУ, мы вядзём навучанне па іхніх планах і з іхняй дапамогай, структура і рыштунак атрада ўзгоднены са спецыялістамі УСУ. Крыніцы, якімі карыстаецца БДУ, нам невядомыя", — дадае ён. А крыху пазней адказвае і чаму трэніроўкі праходзяць у Чэхіі, а не ва Украіне:

"Гэта дылетанцкае меркаванне, прабачце. У ЕС цяпер нашмат больш рэсурсаў і магчымасцяў для бяспечных і эфектыўных трэніровак, закупак тэхнікі і абсталявання. А баявое зладжванне праводзіцца ўжо зараз з дапамогай спецыяльнага праграмнага забеспячэння. Мы робім сваю справу добра і якасна, нам незразумела, адкуль ідуць нападкі на беларускія арганізацыі.

Па-ранейшаму чакаем выбачэнняў ад БДУ і рыхтуем сваю афіцыйную заяву".

"Пражскі камплект", які Prague Support Team збірае для беларускіх валанцёраў ва Украіне

BYSOL і Prague Support Team — вядомыя арганізацыі, якія з пачатку вайны ва Украіне аказалі істотную дапамогу ў тым ліку і беларускім добраахвотнікам. Напрыклад, PST забяспечвае байцоў так званымі "Пражскімі камплектамі" — неабходнай экіпіроўкай, якая дапамагае эфектыўна дзейнічаць на вайне, і ўвогуле выжыць. Чым выкліканы наезд на іх з боку не менш вядомых і паважаных каліноўцаў?

Справа ў тым, што ў кіраўніцтве палка імя Каліноўскага лічаць, што менавіта іх фармаванне ўвасабляе ўдзел беларусаў у абароне Украіны. Інакш кажучы, сродкі, экіпіроўка, аўтамабілі і ўсё іншае, што дыяспары збіраюць на карысць беларускіх валанцёраў, мусяць праходзіць праз каліноўцаў — і ніяк інакш.

Часам гэта даводзіцца да прадстаўнікоў дыяспар з пагрозамі, ва ўльтыматыўным парадку: маўляў, сабранае вамі вам не належыць, бо сабрана менавіта "пад полк імя Каліноўскага". Запіс адной з такіх размоваў ёсць у рэдакцыі Еўрарадыё.

А часам гэтая барацьба за фінансаванне, якую вядзе кіраўніцтва каліноўцаў, абарочваецца сілавымі канфліктамі. Як, напрыклад, было ў Адэсе, дзе дзейнічала яшчэ адно добраахвотнае беларускае фармаванне — атрад імя Іллі "Літвіна". 23 траўня каліноўцы прыехалі ў Адэсу і з гвалтам забралі ў "літвінаўцаў" два аўтамабілі і экіпіроўку, а таксама перахапілі кантроль над тэлеграм-каналам атрада.

Дарэчы, у стрыме на тг-канале Balaganoff, дзе каліноўцы тлумачылі, чаму і навошта ездзілі ў Адэсу, удзельнічаў якраз згаданы вышэй Радзівон Батулін. А разам з ім Дзяніс "Кіт", які нейкі час выконваў абавязкі камандзіра палка.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.