Хто пастаўляе запчасткі для гаража Лукашэнкі і возіць іх у Расію. Расследаванне

Адзіная ўладальніца нямецкай фірмы — Марыя Тэйлар, дачка Алега Грынкевіча, якая жыве ў Дубліне.

Асноўныя краіны збыту для ATH&S GmbH — Расія, Беларусь, Казахстан.

На расійскім рынку ATH&S GmbH супрацоўнічаў з фірмай "А.П.Р." — ключавым актывам сям'і Грынкевічаў у Расіі.

Мытныя звесткі паказалі, што ў 2020 і 2021 гадах прыкладна траціна ўсіх аб'ёмаў імпартных запчастак "А.П.Р." закупляла менавіта ў ATH&S GmbH наўпрост ці на яе даручэнне.

У грашах гэта больш за 100 мільёнаў долараў за два гады. Бізнес набіраў абароты, але сітуацыя рэзка памянялася ў 2022 годзе, калі Расія напала на Украіну.

Пасля пачатку вайны

Пасля пачатку вайны Еўрасаюз забараніў прадаваць у Расію люксавыя машыны і запчасткі да іх.

Санкцыі сталі пагрозай для "Армтэка", але ашчадныя бізнесоўцы знайшлі выхад. Як сцвярджае "Бюро", яны арганізавалі пастаўкі запчастак праз трэція краіны, на якія не распаўсюджваюцца абмежаванні. І зарабілі на гэтым яшчэ больш, чым да вайны.

У 2022 годзе нямецкая і расійская фірмы практычна перасталі працаваць наўпрост. ATH&S GmbH рэзка памяняла свайго ключавога пакупніка, а "А.П. Р." — ключавога пастаўшчыка: ім аказалася адна і тая ж кампанія з Казахстана — "ЗапчастьТрейд".

У адрозненне ад Расіі і Беларусі, Казахстан не знаходзіцца пад заходнімі сектаральнымі санкцыямі.

Згодна з мытнымі звесткамі, "ЗапчастьТрейд" у 2022 годзе прадала расійскай фірме тавараў амаль на 20 мільёнаў долараў, у 2023 годзе — ужо на 60 мільёнаў.

"ЗапчастьТрейд" — яшчэ адна кампанія братоў Грынкевічаў. Створаная ў 2017 годзе для выхаду на казахскі рынак, яна адыграла асаблівую ролю — на фоне заходніх санкцый абароты "А.П.Р." наблізіліся да мільярда долараў.
 

Праз трэція краіны

Расійскі дыстрыб'ютар закупляе запчасткі не толькі праз Казахстан. Летась "А.П.Р." завезла ў Расію тысячы аўтазапчастак, якія знаходзяцца пад санкцыямі.

Краінай паходжання гэтых дэталяў пазначаныя пераважна Турцыя і Кітай, але ёсць і Італія, Іспанія, Польшча.

Затое вытворца прапісаны толькі адзін — нямецкая фірма ATH&S GmbH. Аб'ём паставак толькі па адным гэтым вытворцу за мінулы год перавысіў 76 мільёнаў долараў.

Але акрамя яго "А.П. Р." завозіла ў Расію запчасткі і іншых вядомых нямецкіх брэндаў, зробленыя як у Еўропе, так і за яе межамі. Агульны аб'ём імпарту за мінулы год перавысіў 270 мільёнаў долараў.
 

Важны тавар

Таксама "А.П.Р." імпартуе ў Расію падшыпнікі, якія лічацца таварам падвойнага прызначэння. Заходнія краіны ўнеслі іх у асаблівы санкцыйны спіс, бо яны могуць выкарыстоўвацца ў расійскай вайсковай тэхніцы на полі бою ва Украіне.

Паводле мытных звестак, летась "А.П.Р." завезла ў Расію больш за 17 тысяч падшыпнікаў еўрапейскага паходжання на суму звыш 340 тысяч долараў.

У мытных звестках расследавальнікі ўбачылі, што пастаўкі ідуць пераважна на даручэнне эмірацкай кампаніі Texco FZE.

Texco FZE з'явілася неўзабаве пасля вайны — у траўні 2022 года. Гэта "Бюро" пацвердзіў былы работнік "Армтэка", які ведае пра цяперашнюю дзейнасць дыстрыб'ютара запчастак.

Генеральны і выканаўчы дырэктары эмірацкай фірмы працуюць ці раней працавалі на "Армтэк".

Ціхая гавань

Паводле інфармацыі "Бюро", каля дзесяці гадоў таму Вадзім Грынкевіч купіў сабе тры раскошныя кватэры ў Дубаі амаль за 2 мільёны долараў і зарабляе на іх арэндзе.

У дубайскім рэестры ён таксама пазначаны менеджарам эмірацкай фірмы Pantek FZCO. У яе ёсць "дачка" ў Ірландыі пад падобнай назвай — Pantek Automotive Limited.

У справаздачы за 2021 год ірландская фірма пазіцыянавала сябе як штаб-кватэра групы "Армтэк". Цяпер, відаць, цэнтральны офіс групы кампаній перамясціўся ў ААЭ.

Вадзім Грынкевіч не адказаў на званкі журналістаў "Бюро". Алег Грынкевіч сказаў, што "Армтэк" не супрацоўнічае з бюджэтнымі арганізацыямі ні ў адной краіне.

Але інфармацыя пра кантракты "Армтэка" з беларускімі дзяржорганамі размешчаная на электроннай гандлёвай пляцоўцы Нацыянальнага цэнтра маркетынгу і кан'юнктуры цэн.

Бізнесовец таксама запэўніў, што "Армтэк" не парушае міжнародныя санкцыі.