Хакерская атака на Варшаўскі ўніверсітэт магла зачапіць і студэнтаў з Беларусі

Варшаўскі ўніверсітэт паведаміў пра хакерскую атаку, яна можа зачапіць і студэнтаў з Беларусі. У даркнэце апынуліся асабістыя даныя: імёны і прозвішчы, даты нараджэння, грамадзянства, нумары пасведчанняў асобы і пашпартоў, адрасы пражывання, нумары тэлефонаў ды іншае.

Злачынцы выпампавалі прыкладна 850 Гб даных, з якіх 200 Гб утрымліваюць канфідэнцыйную інфармацыю. Узлом мог адбыцца яшчэ ў студзені ці ў лютым. Хакеры карысталіся дзейнымі логінам і паролем, таму доўгі час заставаліся незаўважанымі.

Большасць скапіяваных файлаў паходзіла з двух падраздзяленняў універсітэта: факультэта сучасных моваў і літаратуры ды факультэта дастасоўных сацыяльных навук і рэсацыялізацыі. Маючы доступ да базы, можна даведацца, якія грамадзяне Беларусі навучаліся там ці працягваюць навучацца цяпер.

Але, як запэўнілі Еўрарадыё ў сакратарыяце Праграмы Каліноўскага, выцечка не закранула беларускіх студэнтаў гэтай праграмы. У профілях, якія аказаліся ў руках хакераў, няма пазнак, ці належыць студэнт да Праграмы Каліноўскага