Каранавірус выявілі ў кадэцкай вучэльні ў Слуцку
![Каранавірус выявілі ў кадэцкай вучэльні ў Слуцку](/sites/default/files/styles/gallery_main/public/2023-08/kadety-2505.jpg.webp?itok=nOMGpiDs)
Успышка каранавіруса зафіксаваная ў кадэцкай вучэльні ў Слуцку. Паводле інфармацыі TUT.by, захварэлі не толькі вучні, але і выкладчыкі.
Адзін з навучэнцаў распавёў, што COVID-19 выявілі ў навучэнцаў і выкладчыка. Кадэтам нібыта паведамілі пра гэта ў сераду, 20 траўня. Цяпер у Мінскім абласным цэнтры медыцынскай рэабілітацыі "Загор'е" знаходзяцца некалькі чалавек.
Дырэктар вучэльні Сяргей Мяцельскі ў каментары выданню mlyn.by пацвердзіў, што ёсць выпадкі заражэння каранавірусам. "У аднаго навучэнца тэст даў станоўчы вынік. Тут жа хутка былі вызначаныя ўсе кантакты, з якімі хлопец меў зносіны за апошнія 14 дзён. Ва ўсіх хлопцаў, хто знаходзіўся ў вучэльні, узялі мазок — многія вынікі ўжо прыйшлі, астатнія чакаем з дня на дзень", — патлумачыў Мяцельскі.
Па яго словах, у вучэльні ўведзены асаблівы рэжым, як і ва ўсіх навучальных установах краіны. Навучэнцы не ўдзельнічаюць у масавых мерапрыемствах, пабочным уваход абмежаваны, праводзіцца дэзінфекцыя.
На хатняе навучанне па рашэнні бацькоў перайшлі 18 з 220 навучэнцаў вучэльні.
Галоўны санітарны лекар Слуцкага раёна Павел Кучко пацвердзіў TUT.by, што ў вучэльні ёсць выпадкі COVID-19 як сярод навучэнцаў, так і ў персаналу. Аднак колькасць заражаных ён не назваў. "Большасць пацыентаў клінічна здаровыя, нават не шпіталізаваныя. У цэлым у Слуцку і Слуцкім раёне сітуацыя кантраляваная", — заявіў Кучко.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.