Вы тут

"Вывозіць сабак на доследы і фарш": у прыюце на Гурскага пабіліся зоаабаронцы

Вольга Барабаншчыкава і кот. Не супер

У Мінску ў прытулку для бяздомных жывёл на вуліцы Гурскага, 42 адбыўся канфлікт паміж зоаабаронцай Святланай Харэвіч і супрацоўніцамі прытулку "Суперкот". Удзельніцы бойкі абвінавачваюць адна адну ў нанясенні пабояў, а на Вольгу Барабаншчыкаву, якая падтрымала абаронцаў жывёл, "Суперкот" вырашыў і ўвогуле падаць у суд. Еўрарадыё разбіраецца, хто "вывозіць сабак на доследы і фарш", хто каго "біў галавой аб вальер" на Гурскага і чым завершыцца зоаабарончае супрацьстаянне.

Вечарам 8 студзеня былая тэнісістка, спявачка і ўладальніца моднага брэнда Вольга Барабаншчыкава паведаміла ў Instagram, што прадстаўнікі прытулку "Суперкот" Кацярына Кузняцова і Анжаліка Кірута збілі ў прытулку для жывёл на Гурскага, 42 старшыню зоаабарончай арганізацыі "Парытэт" Святлану Харэвіч. "Тая спрабавала спыніць машыну з вывазам жывёл на доследы", — піша Вольга Барабаншчыкава. У яе ў stories апублікаваныя відэа, дзе нехта сапраўды выводзіць сабак па калідоры, а Святлана крычыць: "Выклічце міліцыю!".

"Я сядзела дома з дзіцём, калі мне даслалі гэтыя відэа, — распавядае Вольга журналісту Еўрарадыё. — Гэта было вельмі эмацыйна, Святлана прасіла пра дапамогу, казала, што ёй пагражаюць, аблайваюць і збіваюць, таму я выклала іх у Instagram".

Па словах Вольгі, у пазамінулым годзе яна ўбачыла ў Мінску машыну, запоўненую жывёламі ў клетках. На пытанне, куды іх вязуць, ёй адказалі: у прытулкі і сям'і ў Расію. "Мне здаецца, што любы разважны чалавек разумее, што ў Расіі сітуацыя з бяздомнымі жывёламі нічым не лепшая, чым у нас", — кажа яна.

Вольга лічыць, што работнікі "Суперката" маюць дачыненне да вывазу беларускіх жывёл за мяжу "на мяса і доследы":

"Як толькі нехта з валанцёраў спрабуе падняць гэтую тэму, яму зачыняюць уваход у "Фауну горада", таму многія маўчаць. Але трэба разумець, што сёння за адзінкамі сапраўды ўладкаваных сабак стаяць сотні тых, якія зніклі. Улік жывёл, якіх вывозяць з прытулку, не вядзецца. Забраць іх вельмі проста. Гэта трэба спыняць".

"Пагражалі матам, казалі, што ўвогуле заб'юць"

Пра тое, што здарылася ў прытулку ў аўторак, распавядае старшыня СЭГА "Парытэт" Святлана Харэвіч. У арганізацыі заключаны дагавор з "Фауна горада" на дапамогу беспрытульным жывёлам.

"Нашы валанцёры займаюцца выгулу сабак, дапамагаюць сабраць грошы на лячэнне і стэрылізацыю, шукаюць гаспадароў, — кажа зоаабаронца. — На Гурскага мы прыязджаем кожны дзень. У аўторак я была там з 15:00 да 19:00".

Па словах Святланы, каля 17:30 у гадавальнік прыехалі Кацярына Кузняцова, Анжаліка Кірута і яшчэ адна валанцёрка з "Суперката". Яны выводзілі з вальераў самых маладых і ласкавых шчанюкоў і афармлялі іх у адміністрацыі на свае пашпарты.

"Я закрычала: "Глядзіце, "Суперкот" зноў вывозіць сабак!", Падышла да стойкі рэгістрацыі і паспрабавала даведацца, куды. Спрабавала здымаць усё на тэлефон. Анжаліка, Кацярына і трэцяя жанчына падляцелі да мяне, заламалі рукі і спыталі: "Ты заткнёшся ці не?". Я пачала крычаць: "Выклічце міліцыю!". Адміністратар не выклікала. Тры жанчыны пацягнулі мяне ў іншы калідор, білі аб сценку, пагражалі матам, казалі, што ўвогуле заб'юць".

Праз некаторы час, па словах Святланы, жанчыны забралі яшчэ аднаго сабаку і з'ехалі.

Пасля кіраўнік "Парытэта" напісала заяву ў міліцыю пра тое, што яе збілі. Пабоі Святлана пакуль не здымала, кажа, што зробіць гэта пазней, паколькі іх можна зняць на працягу двух тыдняў.

"Святлана была проста ў істэрычным стане, крычала, мацюкалася на ўвесь калідор"

Старшыня МГААЖ "Суперкот" Кацярына Кузняцова заявіла Еўрарадыё, што Святлану Харэвіч ніхто не біў, а вось сама Святлана білася з усіх сіл:

"Мы прыехалі, каб забраць некаторых жывёл сабе, таму што ў прытулку ўстаноўленыя дызельныя цеплавыя гарматы, і там немагчыма дыхаць. Святлана Харэвіч пачала здымаць нас на мабільны тэлефон. Крычала, маўляў, вось скуралупы, забіраюць жывёл на фарш. Мы папрасілі, каб яна перастала здымаць. Яна на нас накінулася, мяне канкрэтна ўдарыла галавой аб вальер, Анжаліцы Керуце выдрала валасы. Яна была проста ў істэрыцы, крычала, мацюкалася на ўвесь калідор, яе папрасілі выйсці. Мы з ёй не біліся, яе ніхто не збіваў.

forum.zooshans.by

Я ж адчуваю сябе дрэнна. У сераду разам з Анжалікай Керутай мы былі на судмедэкспертызе. Зафіксаваныя пабоі. Мы напісалі заяву ў міліцыю і таксама збіраемся падаць у суд на Вольгу Барабаншчыкаву за паклёп. Ніводнага факта, які пацвярджае тое, што яна напісала, няма. Усіх жывёл мы уладкоўваем да добрых гаспадароў, якія за гэта нам удзячныя. Даць адной фізічнай асобе інфармацыю, якая фізічная асоба забрала сабаку, мы не маем права".

Паведаміць такую ​​інфармацыю "Суперкот" можа толькі па запыце пракуратуры, падкрэсліла Кацярына Кузняцова.

З афіцыйнага звароту грамадскага аб'яднання "Суперкот" ад 9 студзеня 2019 года

"Грамадскае аб'яднанне "Суперкот" сутыкнуўся з беспрэцэдэнтным ціскам з боку адной з медыйных персон, якая распаўсюджвае загадзя ілжывую і паклёпніцкую інфармацыю, якая правакуе на эмоцыі і агрэсію многіх грамадзян. Дадзеная хлусня можа нанесці непапраўную шкоду ў першую чаргу жывёлам, якіх мы ратуем.

Мы просім перавесці дадзены канфлікт ў прававое рэчышча, з мэтай не нашкодзіць у першую чаргу жывёлам. Сёння мы былі вымушаныя звярнуцца да юрыстаў, з мэтай прыцягнення да адказнасці ўсіх вінаватых асоб, згодна з беларускім заканадаўствам.

МГААЖ "Суперкот" ніколі не займалася вывазам жывёл на доследы, усыпленне, выраб фаршу.

Нашай задачай заўсёды быў і будзе пошук новых гаспадароў для пацярпелых жывёл, выкананне прызначэнняў з боку ветэрынарных лекараў, а таксама забеспячэнне паўнацэннага жыцця для жывёл-інвалідаў.

Хочам нагадаць, што публічнае распаўсюджванне паклёпніцкай інфармацыі караецца згодна з Артыкулам 188 п.2 КК Рэспублікі Беларусь".

Больш важных навінаў у выніковай праграме ЕЎРАЗУМ: