Камандзірка эвакуацыі Настасся Махамет пакідае полк Каліноўскага
Настасся Махамет / @neiserika / Instagram
Да канца года парамедык беларускіх добраахвотнікаў Настасся "Север" Махамет пакіне полк Каліноўскага. Пра гэта дзяўчына паведаміла ў сваім акаўнце ў Інстраграме.
"У мяне ёсць прычына больш тут не заставацца. Падрабязнасцяў не дадзены момант не будзе. Як гаворыцца, без каментароў", — напісала яна.
У каментары "Нашай Ніве" камандзірка эвакуацыі батальёна "Волат" удакладніла, што яе рашэнне не звязанае са здароўем.
Пры гэтым Махамет не стала адказваць на пытанне, застанецца яна ў шэрагах добраахвотнікаў ці зусім пакіне іх.
Настасся Махамет запісалася медыкам у тэрабарону на трэці дзень поўнамаштабнай агрэсіі Расіі супраць Украіны. У сакавіку 2022-га перайшла да беларускіх добраахвотнікаў, якім быў патрэбны лекар.
Сёлета ў красавіку Настассю параніла: снарад узарваўся побач з машынай, на якой ехалі медыкі.
Настасся ўзнагароджаная ордэнам "За мужнасць" 3-й ступені. Таксама яна мае медаль БНР за баявыя заслугі.
Настасся Махамет удзельнічала ў акцыях пратэсту 2020 года. А ў 2021-м праз Маскву выехала ў Кіеў.
