Калядная мілата: як людзі па ўсім свеце пераапранаюцца ў Санта-Клаўсаў

28/12/2018 - 13:05

Штогод на Каляды і Новы Год людзі па ўсім свеце пераапранаюцца ў Санта Клаўсаў, Дзедаў Марозаў і ў іншых калядных персанажаў. Вірус барадача ў чырвоным камзоле сядзіць у кожным мужчыне, і ніколі не ведаеш, на які Новы год ён прачнецца. А супраціўляцца яму немагчыма! І вось, ты ўжо прыклейваеш сівую бараду і ўліваешся ў шэрагі магутных старцаў.

Еўрарадыё сабрала самыя цікавыя фатаграфіі святкавання Новага года і Каляд з усяго свету.

Дзеці ў касцюмах Санта-Клаўсаў выконваюць калядныя калядкі ў саборы Святога Патрыка ў горадзе Карачы, Пакістан. Фота: Reuters

Людзі танцуюць перад штогадовай гарадской гонкай Санта-Клаўсаў у Скоп'і, Македонія. Фота: Reuters

Сэйман Клаўс, студэнт бразільскай школы Санта-Клаўсаў, стрыжэ бараду падчас рытуалу "Барбас дэ Молха", якім адзначаюць заканчэнне каляднага сезона. Рыо-дэ-Жанейра, Бразілія. Фота: Reuters

Дзіця, пераапранутае ў Санта-Клаўса, назірае за палесцінцамі на каляднай цырымоніі ўключэння ілюмінацыі на ёлцы ў горадзе Газа, Палесціна. Фота: Reuters

Алені назіраюць, як людзі, апранутыя Санта-Клаўсамі, рыхтуюцца да доўгага каляднага падарожжа. Фота: Reuters

Дзеці на дабрачынным мерапрыемстве "Tokyo Great Santa Run 2018". Фота: Reuters

Людзі, апранутыя ў касцюмы Санта-Клаўсаў, ездзяць на матацыклах каля Эйфелевай вежы падчас “Carabalade”, штогадовага параду Санта-Клаўсаў у Парыжы, Францыя. Фота: Reuters

Паула Мурао прыкідваецца Санта-Клаўсам на пляжы Копакабана ў Рыо-дэ-Жанейра, Бразілія. Фота: Reuters

Вадалаз у касцюме Санта-Клаўса пазіруе з акуламі ў акіянарыуме на Антыбах, Францыя. Фота: Reuters

Парад Дзедаў Марозаў у Мінску прайшоў 24 снежня і 25 у Магілёве. Па цэнтры сталіцы прайшло каля 250 барадачоў “ад прадпрыемстваў і навучальных устаноў горада”. У шэсці ўзялі ўдзел Снягуркі, Снегавікі, Гномы, Санта-Клаўсы, героі дзіцячых казак і іншыя персанажы.