Іранскія аўтамабілі на беларускім рынку

2000 іранскіх аўтамабілей павінны быць выпушчаны ў Беларусі і пастаўлены на ўнутраны рынак у 2007 годзе. Такую задачу вызначылі ў пастанове Савету Міністраў ад 17 студзеня.

ДАВЕДКА ЕЎРАРАДЫЁ

Названа больш за 130 тавараў, у тым ліку якіх такія неабходныя спажыўцу рэчы, як велатрэнажоры, банкаматы, кандыцыянеры, маторныя лодкі, бытавыя зварачныя апараты ды іншыя. Вытворчасць гэтых тавараў павінна быць асвоена ў 2007 годзе. Цалкам жа праграма імпартазамяшчэння разлічана на 2006—2010 гады.

Першая дамова пра зборку іранскіх аўтамабіляў адбылася ў лютым 2006 году. Ужо ў жніўні ў мястэчку Абчак пад Мінскам пачалася зборка аўтамабіляў маркі “Саманд”.







Вельмі перспектыўнай бачыць вытворчасць легкавых аўтамабіляў маркі “Саманд” на тэрыторыі Беларусі генеральны дырэктар ЗАТ “Юнісон” Дзмітрый Ягораў. Ён лічыць, што гэта толькі першы крок па развіцці галіны вытворчасці легкавых аўтамабіляў ў нашай краіне:


“Яшчэ 11 жніўня 2006 году ў нас было афіцыйнае адкрыццё заводу. Тэхналагічны працэс, абсталяванне, — усё выканана. Мы ўжо сабралі прамыслова-доследную партыю, зараз пачынаем пастаўку машына-камплектаў.


На гэты год вызначана 2 тысячы аўтамабіляў, і гэта сапраўды рэальная лічба. Тут галоўнае, каб іранскія пастаўшчыкі нас не падвялі з пастаўкамі. Усё астатняе па вытворчым цыкле ў нас падрыхтавана, таму мы можам і больш вырабіць”.


З ГІСТОРЫІ ПЫТАННЯ

Першая спроба распачаць зборку легкавых аўтамабіляў у Беларусі адбылася ў 1997 годзе. Тады кампанія Ford Motor Company (FMC) пабудавала ў Абчаку завод па зборцы легкавых аўтамабіляў маркі FORD. У 2001 годзе галоўны інвестар, кампанія Ford, выйшаў з праекта і планаваная вытворчасць была закансервавана амаль на тры гады.

Другая спроба збіраць аўтамабілі на той жа вытворчай базе адбылася увесну 2004 года Тады завод пачаў выпуск аўтамабіляў маркі “Люблін-3”, якія ішлі пераважна ў Польшчу, ў рамках вытворчай кааперацыі з заводам у Любліне.

Аўтамабілі “Саманд” класа “Стандарт” і “Люкс”, вытворчасць якіх ужо пачалася, збіраюцца амаль у поўнай адпаведнасці з “Пежо 405”, вытворчасць якіх была спынена ў свой час у Францыі.


Але абвешчаны кошт машыны — 12,5 тысяч долараў, як лічыць незалежны аглядальнік аўтамабільнага рынку Дзмітрый Навіцкі, занадта высокі для звычайнага беларускага спажыўца.


“Любы хаця б крыху свядомы чалавек ведае, што ў сусветнай табелі аб рангах Iran Khodro займае далёка не першае месца. Не хацелася, каб беларусаў пазбаўлялі нармальнага, якаснага прадукту еўрапейскай ці японскай вытворчасці і давалі замест іранскі аўтамабіль, зроблены па французскай ліцэнзіі.


Я ездзіў на гэтай машыне, гэта дастаткова камфартабельны ды зручны аўтамабіль. Але, на жаль, яго тэхналагічны ўзовень не высокі, як былыя ў карыстанні, патрыманыя машыны канца 80-х — пачатку 90-х. Калі ў нас ідзе праграма імпартазамяшчэння, то, канешне, можна чакаць павышэння пошлін на новыя машыны ці яшчэ якога-небудзь ходу з боку дзяржавы дзеля таго, каб людзі набывалі такую прадукцыю беларускай зборкі.


У любым выпадку павінен быць выбар. Мне так падаецца, што ўсё ідзе да таго, што выбар беларускага аўтааматара жадаюць абмежаваць”.


Атрымліваецца, што ў Беларусі пачалася вытворчасць аўтамабіляў, роўных па якасці машынам канца 80-х, а па коштах — пачатку 21-га стагоддзя. Цікава будзе паглядзець, ці вытрымаюць аўтамабілі “Саманд” канкурэнцыю, калі яна будзе сумленнай з боку дзяржавы.


Таксама ж паўстае пытанне, ці патрэбна Беларусі займацца развіццём новых галін прамысловасці, прадукцыю якіх нашмат танней набыць, чым вырабіць.


Фота з сайту www.alfo-trade.kiev.ua




Апошнія навіны

Галоўнае

Выбар рэдакцыі