Іосуб: Людзям страшна захоўваць грошы ў беларускіх рублях

Па звестках Нацбанка, у кастрычніку чыстая купля насельніцтвам валюты дасягнула амаль 380 мільёнаў долараў. Прычым купля валюты пераважае над продажам пяты месяц запар.

Эксперт кажа, што прычынаў для гэтага дзве — эканамічная і псіхалагічная.

Вадзім Іосуб: "У нас на працягу ўсяго года рост сярэдняга заробку дастаткова сур'ёзна абганяў рост прадукцыйнасці працы. Іначай кажучы, грошай на руках у насельніцтва станавілася больш, чым, груба кажучы, на гэтыя грошы можна было б набыць беларускіх тавараў, заплаціць за беларускія паслугі".

Таму грамадзяне куплялі імпартныя тавары альбо ўкладалі грошы ў валюту.

Другая прычына, па словах Іосуба, — псіхалагічная: чаканне дэвальвацыі. Як прыкмету гэтага аналітык называе і тое, што беларусы пераводзяць свае рахункі з рублёвых у валютныя, хоць у рублёвых высокія стаўкі — пад 50% гадавых.

Іосуб: "Псіхалагічны фактар — гэта дастаткова высокія дэвальвацыйныя чаканні, якія на высокім узроўні падтрымліваюцца з сёлетняга чэрвеня. Аж да кастрычніка гэты працэс працягваецца. Людзям страшна захоўваць грошы ў беларускіх рублях. Яны бягуць з беларускага рубля і купляюць валюту".

Нагадаем, што Аляксандр Лукашэнка нядаўна заявіў, быццам масавая купля валюты ў абменніках можа стаць прычынай будучай дэвальвацыі.

Фота — uvaga.by