Ілля Міцько скраў навагодні хіт у Джорджа Майкла?
Еўрарадыё заўважыла падабенства песень “Кто вы, люди?” новага праекта Міцько Love&Doors і “Last Christmas” Джорджа Майкла.
Пад Новы год акулы шоў-бізу запісваюць навагоднія хіты. Яшчэ летам на беларускіх радыёстанцыях з’явілася чыстая-светлая песня праекта Іллі Міцько Love&Doors “Кто вы, люди?”
“Наколькі я ведаю, і музыку, і словы гэтай песні напісаў сам Ілля Міцько, — распавёў Еўрарадыё гітарыст Love&Doors Дзмітрый Дзямідаў. — Аранжыроўку зрабіў Андрэй Сланчынскі. А ў запісу з жывых музыкаў бралі ўдзел Аляксей Зайцаў і я. І Крысціна Садоўская спявае”.
Тэкст
песні “Кто вы, люди?” варты асобнага літаратуразнаўчага аналізу. Лёгкая
мелодыя і ўрачыстая святочная аранжыроўка падаліся нам нашмат больш
удалымі і… падобнымі да нейкай іншай песні. Неўзабаве мы знайшлі: гэта
песня дуэта Wham! з назвай “Last Christmas” — калядны хіт 1984 года.
Ілля Міцько, верагодна, прадбачыць, што песня
стане вельмі папулярнай. Ён нават паставіў яе тонінгам на свой тэлефон.
На жаль, музыка цяпер у Германіі набывае новы гастрольны аўтобус для
гурта і таму паразмаўляць з намі пра творчасць аўтара “Last Christmas”
Джорджа Майкла ён адмовіўся.
Ілля Міцько: “Я ў Германіі, тэлефануйце на наступным тыдні”.
Калі ж мы запыталіся пра Джорджа Майкла ў Дзмітрыя Дзямідава, ён зусім не здзівіўся:
“Калі
гэтая песня на нешта падобная — я не здзіўлюся. Больш за тое — мяне
гэта ніяк не турбуе. Таму што калі такія пытанні ўзнікаюць, заўжды
прыгадваецца адна прымаўка: “Уся музыка ўжо даўно прыдуманая, але не ўсе
грошы атрыманыя!”, — распавёў гітарыст.
За 25 гадоў
на “Last Christmas” было зроблена безліч кавераў і рэміксаў. Яе
пераспяваў нават Crazy Frog! Але ўсе шчырыя пераробкі так і называюцца:
“Last Christmas”.
“Гэта ні ў якім разе не плагіят, — падзяліўся меркаваннем з Еўрарадыё прадзюсер і кампазітар Уладзімір Кубышкін. —
А тое, што Ілля выбраў менавіта такі ход, я лічу ўдалым і стылёвым.
Гэтая песня выклікае ўсмешку і станоўчыя эмоцыі. І я не выключаю, што
Ілля гэта зрабіў свядома. Бо ён у добрым сэнсе слова мегакан’юнктурны
чалавек: ведае, што трэба людзям, і прапануе ім тое, што можа лёгка
ўспрымацца”.
“Кожную песню, вось кожную, абсалютна кожную
можна ўзяць — і знайсці да яе яшчэ пару з падобнымі месцамі ці падобныя
па форме, ці з падобнымі матывамі, мелодыямі, — працягвае Дзмітрый Дзямідаў. — Бо гармоній, якія выкарыстоўваюцца ў сучаснай музыцы, не так-то і шмат… Таму шмат падобных песень”.
Вось
і мы кажам: шмат падобных песень. Ці быў тут сапраўды плагіят —
дакладна можа сказаць толькі суд. Але наўрад ці Джордж Майкл
калі-небудзь пачуе беларускі хіт.