Грамадзянін Латвіі вёз у Беларусь 150 патронаў пад сядушкай. Фота

У джыпе Grand Cherokee, на якім у Беларусь ехаў грамадзянін Латвіі, мытнікі нечакана выявілі цэлы склад боепрыпасаў. Як паведамляе interfax.by, здарэнне адбылося ў пункце мытнага афармлення "Бігосава-1".

Пад пасажырскім сядзеннем аўтамабіля мытнікі знайшлі поліэтыленавы пакет, у якім знаходзіліся кардонныя скрынкі з патронамі 12-га калібра. Агулам замежнік перавозіў 150 патронаў, не адзначыўшы іх у мытнай дэкларацыі.

У мытні адзначылі, што перавоз патронаў праз мяжу дапускаецца толькі пры наяўнасці дэкларацыі і пісьмовага дазволу ад Міністэрства ўнутраных спраў Беларусі.

Цяпер па факце кантрабанды патронаў Віцебская мытня праводзіць праверку. Грамадзяніну Латвіі пагражае крымінальная справа.

Фота — Мытны камітэт