Гомельскія фанаты зладзілі перфоманс са старажытным гербам горада (фота)
Падчас футбольнага матча "Гомель" — "Шахцёр" (Салігорск) ультрас гаспадароў зрабілі адмысловы перфоманс з беларускамоўнымі банэрамі.
А па цэнтры трыбуны яны ўзнялі эмблему клуба і старажытны герб Гомеля.
На адным з палотнішчаў былі намаляваныя абрысы адметных пабудоў горада і лічба "1142"— год першай згадкі Гомеля ў летапісе. На другім банэры была выява прадстаўнікоў фан-руху "зялёна-белых" з лічбай "1959" — годам стварэння футбольнай каманды ў Гомелі.
Пад малюнкамі змяшчаліся словы "Гэта мой горад. Гэта мой клуб".
Праўда, "Гомель" на сваім полі прайграў "Шахцёру" — 0:1.
