Вы тут

Генпракурор назваў "карту паляка" элементам гібрыднай вайны

Андрэй Швед / БЕЛТА

Генпракурор Андрэй Швед назваў “карту паляка” формай падрыўной, антыдзяржаўнай працы і гібрыднай вайны. Відэа з такой заявай апублікаваў у сваім ТГ-канале супрацоўнік тэлеканала АНТ Ігар Тур.

"Усё гэта элементы гібрыднай вайны, гэта ўсё элементы антыдзяржаўнай дзейнасці. Нават тыя "скокі на касцях", якія ладзіліся там прадстаўнікамі розных так званых адукацыйных цэнтраў, — гэта ні што іншае як рэабілітацыя нацысцкіх злачынцаў, польскіх злачынцаў і не што іншае як элементы раскладання знутры нашага грамадства, асабліва моладзі, фармаванне з іх нейкіх перадавых атрадаў. Па сутнасці, рэалізацыя задум польскіх уладаў тут, на тэрыторыі Рэспублікі Беларусь", — заявіў генпракурор.

"Карта паляка" — гэта дакумент, які пацвярджае прыналежнасць асобы да польскага народу. Польшча выдае гэты дакумент грамадзянам краін, якія раней уваходзілі ў СССР, калі іх продкі жылі на тэрыторыі міжваеннай Польшчы.

"Карта паляка" дае магчымасць бясплатна атрымліваць доўгатэрміновую нацыянальную візу, легальна працаваць на тэрыторыі Польшчы, бясплатна наведваць дзяржаўныя музеі Польшчы, атрымліваць бясплатную адукацыю ў Польшчы ды інш.

У Беларусі "карту паляка" атрымалі больш за 130 тысяч чалавек. Дзяржаўным службоўцам у Беларусі мець "карту паляка" забаронена.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.