Франак Вячорка прызваны законна, лічаць у Міністэрстве абароны

іраўнік маладзёжнай арганізацыі
Партыі БНФ "Моладзь БНФ" Франак Вячорка прызваны на тэрміновую службу
на законных падставах, заявілі на сустрэчы з журналістамі 30 студзеня ў
Мінску прадстаўнікі Міністэрства абароны.

Паводле слоў начальніка прэс-службы Мінабароны Вячаслава Раменчыка,
Ф.Вячорка прыдатны па стане здароўя для праходжання ваеннай службы. "Ён
не можа праходзіць службу ў сілах спецыяльных аперацый, дык ён туды і
не трапіць", — дадаў першы намеснік начальніка галоўнага ўпраўлення
ідэалагічнай працы Мінабароны Уладзімір Макараў.

В.Раменчык зазначыў, што згодна з Канстытуцыяй і законам аб воінскім
абавязку і ваеннай службе да прызыву прыцягваюцца грамадзяне
мужчынскага полу ва ўзросце ад 18 да 27 гадоў незалежна ад палітычных
поглядаў і веравызнання. Паводле яго слоў, Ф.Вячорку дадзена магчымасць
"навучыцца выконваць свой  абавязак і канстытуцыйны доўг". В.Раменчык
заявіў, што калі Ф.Вячорка лічыць, што пры яго прызыве парушаны закон,
ён можа звяртацца ў суд.

Прадстаўнікі Мінабароны абверглі інфармацыю аб тым, што ў воінскую часць маладога чалавека даставілі ў наручніках.

Каментуючы негатыўную рэакцыю міжнародных структур на прызыў у
беларускую армію маладых апазіцыйных палітыкаў, У.Макараў заявіў: "Гэта
класічная інфармацыйная акцыя. Яна скіравана супраць краіны і яе
шматвектарнай палітыкі".