Фальшываманетчыкі куплялі на свае "вырабы" жуйку і квіткі ў транспарт

Следчы камітэт завяршыў расследаванне крымінальнай справы аб падробцы новых дваццацірублёвых купюраў. Следства вёў Фрунзенскім (г.Мінска) райаддзел Следчага камітэта. Абвінавачанне выставілі двум жыхарам сталіцы, паведамляецца на сайце Следчага камітэта.

Гэта першы ў Беларусі выпадак, калі падраблялі новыя грашовыя купюры.

Сёлета ўзімку 28-гадовы мужчына ў сябе на лецішчы стаў друкаваць падробленыя 20-рублёвыя купюры з дапамогай ноўтбука і друкаркі. Фальшывыя банкноты ён перадаваў свайму 26-гадоваму знаёмаму з Мінску. На падробленыя грошы мінчук купляў розную драбязу: жуйку, квіткі для грамадскага транспарту, расплочваўся імі ў маршрутных таксоўках і г.д. На рэшту яму давалі сапраўдныя купюры, якія супольнікі і дзялілі паміж сабой.

Пры ператрусе па месцы жыхарства падазраваных праваахоўнікі забралі камп'ютарную тэхніку, фальшывыя банкноты наміналам 20 беларускіх рублёў, прылады для кропельна-струмянёвага друку, нарыхтоўкі для пячатак з адбітка штампаў розных арганізацый, бланкі даведак аб даходах фізічнай асобы, а таксама іншыя прадметы, якія выкарыстоўваюцца для вырабу фальшывых дакументаў.

Экспертыза паказала, што знойдзеныя 20-рублёвыя банкноты былі фальшывымі. Яны друкаваліся на струмянёвым прынтары, ахоўную нітку вытворцы імітавалі пры дапамозе каляровага струмянёвага друку з нанясеннем фрагментаў фольгі на адным баку грошай.

Пазней следчыя выявілі таксама, што напарнікі зрабілі фальшывую даведку аб даходах фізічнай асобы, каб атрымаць крэдыт.

Абодвум мужчынам выставілі абвінавачанне ў вырабе і збыце падробленых грошай, замаху на тыя ж дзеянні, учыненыя паўторна, а таксама ў падробцы і вырабе падробленых дакументаў і штампаў. Агулам ім інкрымінуецца 26 эпізодаў злачыннай дзейнасці.

Справа перададзеная пракурору для накіравання ў суд.